शशक पूर्ण करा ----- वामकुक्षी -------- माऊमैया

काहीच सुचत नाहीय. सगळीकडे फक्त अंधारच अंधार. कानावर फक्त पाण्याचा आवाज पडतोय. मनाला एक अनामिक हुरहूर लागून राहिलीय. तेवढ्यात दरवाजा उघडला जातो.
'कसला आवाज? आत्ता तर कुठे डोळा लागला होता.' ती मनातल्या मनात बोलली.
' एवढ्या पावसात , दुपारी अंगावर पांघरूण घेऊन झोपण्यात कसली मज्जा असते ! शाळेत असताना बऱ्याचदा आम्ही हेच करायचो.'
' ओ मॅडम, पण लग्न झालंय आता आपलं. आठवडाच झालाय. सासूबाईंना काही दुपारी झोपायची सवय नाही. त्यामुळे मलाही मनसोक्त लोळता येत नाही. उगाच अपराधी वाटतं, तरीच मनाला हुरहूर लागलीय.'
' आता उठावंच लागेल. ' तिने डोळे उघडले.
आजूबाजूला बघून हसूच आलं आणि हुश्श पण झालं.

हनिमून रिसॉर्टची रुम न्याहाळत ती नवऱ्याच्या कुशीत शिरली.