शशक पूर्ण करा - अधुरं प्रेम - हाडळीचा आशिक

काहीच सुचत नाहीये. सगळीकडे फक्त अंधारच अंधार. कानावर फक्त पाण्याचा आवाज पडतोय. मनाला एक अनामिक हुरहूर लागून राहिलीय. तेवढ्यात दरवाजा उघडला जातो.....
सभोवताली उजेड पसरला. क्षणार्धात एक लखलखतं हत्यार वेगानं आतमध्ये येत खस्सकन् पोटात खूपसलं गेलं. अपार वेदनेनं त्याचा जीव कळवळला. मीही डोळे घट्ट मिटून घेतले.

काही वेळानं जरासं घाबरतच डोळे उघडले. दरवाजा बंद होऊन सभोवताली पुन्हा काळोख पसरला होता. तो आता सुसह्य वाटला. थोडा सैलावलो तोच पुन्हा दरवाजा उघडला जाऊन माझ्यावरही प्राणघातक वार झाला. डोळे झाकण्याआधी तो चेहरा दिसला आणि संध्याकाळपासून कितव्यांदातरी मी तिच्या प्रेमात पडलो.
'देवा तिला माफ कर!'

जीव सोडण्याआधी तिचा सुमधुर आवाज ऐकला,

"मम्मीsss बटाटे उकडलेत !"

-हाडळीचा_आशिक