शशक पूर्ण करा - वासांसि जीर्णानि - मॅगी

काहीच सुचत नाहीय. सगळीकडे अंधारच अंधार. कानावर फक्त पाण्याचा आवाज पडतोय. मनाला एक अनामिक हुरहूर लागून राहिलीय. तेवढ्यात दरवाजा उघडला जातो.

---

कितीक काळ लोटला तरी या शंभर मजली मनोऱ्यावरच्या प्रचंड खोलीत मी तयारी करत आहे. लाकूडकाम झाले. मानव सोडून बाकी सगळ्या जोड्या वर चढवून झाल्या. गेले वर्षभर सुरू असलेला वादळी पाऊस आणि पुराने अंतिम प्रलय सुरू झाला. आज सगळी पृथ्वी पाण्याखाली आहे. आताच उसळलेली लाट धडकून, दरवाजा फुटून पाण्यात वाहून निघाला आणि मी निर्णय घेतला. बायकोला शिडीवरून खाली माझ्याकडे ओढली आणि साखळदंड सोडला. आम्ही दोघेही पाण्याखाली जाताजाता, पाण्यावर तरंगत दूरवर जाणारी माझी निर्मिती बघतो. मी नोआ! अलविदा.