झी-मराठी : येऊ कशी तशी मी नांदायला

तेच ना... साठलेल्या डबक्यातील पाण्याला वाट मिळाली एकदाची.
तायडा त्या महामाठ काकीला हाताला धरून साळव्यांना पुन्हा सळो-की-पळो करेल अशी दाट शंका येते आहे.

प्रोमो पाहिला..
ऐन लग्नात, गुरुजी नवऱ्याचे नाव विचारतात अवनी(स्वीटू) ला तर बिचारी विसरते..!(नाव घ्यायला लाजत नक्कीच नाही असं एकंदर चेहऱ्यावरून वाटतं)

आजपासून संपली?

नाही हो.. अशी कशी संपेल.

लग्नात तरी केस विंचरले म्हणजे बरं नलीने..

मेधावि: एवढयात बरी सुटका होईल तुमची?
तायडाचा कट कारस्थानांचा आणि साळवी मंडळींचा बावळट, सॉरी, भाबडेपणाचा कोटा अजून संपला नाही काही

भाबडेपणा काय म्हणता.. दळभद्रीपणा म्हणा

ते दादा साळवींना नक्की काय झालंय म्हणावं? स्मृतीभ्रंश की वेडाचा झटका की एखादा अज्ञात आजार? प्रकारच कळत नाहीये तो. पुन्हा तो मोहित दिसला. बघवत नाही त्याची ती खळी.

मग नली तिच्या पेटंट टरक्या नजरेने तायडाकडे बघत तिला ओपन चॅलेंज देत सांगते की तिची मुलगी याच व्हिल्यात येऊन तायडाचा माज कसा उतरवते ते बघ.!! >>>>>>>> म्हणजे सिरियल काही इतक्यात सम्पत नाही म्हणा. आणखी दोन वर्ष आरामात चालेल.

ऐन लग्नात, गुरुजी नवऱ्याचे नाव विचारतात अवनी(स्वीटू) ला तर बिचारी विसरते.. >>>>>>> आता काय स्विटूचा अपघात होऊन मेमरी लॉस झालाय अस दाखवणार की काय?

(नाव घ्यायला लाजत नक्कीच नाही असं एकंदर चेहऱ्यावरून वाटतं) >>>>>>>> तिच्या चेहर्यावरचे भाव तुम्हाला दिसले? अभिनयात ठोकळा आहे ही.

काल साखरपुडा झाला आहे....नलीच्या लग्नातला ( किमान २३-२५ वर्षे जुना ) पण तरी नवा कोरा दिसणारा शालु स्वीटु ने नेसला होता.आणि पहिल्यांदाच केसांची वेणी घातली होती.
सापु होताना एक छोटा अपघात होउन ओम्या च्या हाताला लागते नेमके जिथे अंगठी घालणार त्या बोटालाच...मग शकुबाइ ओम्या डावरा असल्याने डाव्या हातातच अंगठी चालेल असे म्हणातात आणी एकदाचा सापु पार पडतो.
इतके दिवस खायला अन्न नसणारे साळवी चांगले कपडे घालुन आणि नलु आणि सुमन नव्या साडीत कसे काय आले बुवा असं आपण विचारायचं नाही.
नली नी मेकअप दागिने नवी साडी हे सगळं सगळं केलं पण केस काही विंचरले नाहित...व्याहीभोजनाला तेवढा कंगवा द्या बुवा.
किंवा सूनमुखाच्या वेळी नवी सासु सुनेला मांडीवर बसवुन तिचे केस विंचरते असा काही एक विधी असतो ना तेव्हा सूने सोबत तिच्या आइचे पण केस विंचरुन द्यायचा विधी अ‍ॅड करा.

आता लग्नात काहितरी राडे आहेत असं प्रोमो वरुन कळतय...ओम ला गायब करणार आहेत का हा नुसताच काका काकु च्या स्वप्नातला प्रसंग आहे कळत नाही. पण आता इतक्या लांबवर येउन लग्न लावलं नाही तर प्रेक्षक मालिका बघायचे सोडुन देतील एवढं नक्की.
आता पुढची कट-कारस्थानं खानविलकर घरात होउदेत...

"येउ तशी कशी मी नांदायला " हे नाव सार्थ करण्यासाठी शेवटच्या एपिसोड पर्यंत लग्न लांबवणं हा शुद्ध मूर्खपणा आहे

इतके बोलुन मी माझे दोन शब्द संपवते

@ स्मिता श्रीपाद : खोखो: भारी अपडेट्स लिहिलेत.....
नली नी मेकअप दागिने नवी साडी हे सगळं सगळं केलं पण केस काही विंचरले नाहित..>>

दादा साळव्यांना ठाण्याच्या वेड्यांच्या इस्पितळात का टाकत नैत थोडे दिवस..?
लग्नाच्या मंडपाचे बांबू नुसते उभे केले होते.. एक पड्ला तर सटासट सगळे पडले. कापड गुंडाळलेल्या बांबुंपैकी एक बांबु ष्विटूच्या टाळक्यात पडता पडता कडक्या ओम्याने पकडला तर त्याच्या बोटातून रक्त निघालं. कसलं शेमळु आहे ना ओम्या
पडु द्यायचा होता की तो बांबु ष्विटुच्या टाळक्यात.. म्हणजे पुन्हा १० लाखांसाठी घर तायडकडे गहाण पडलं असतं.. अन त्या धक्क्याने दादा सा़ळवी माणसात आले असते.

या लग्नात महाजांबाज तायडा महामाठ काकूला घाबरवून विघ्न आणणार हे जवळ जवळ फिक्स झालंय असं वाटतंय.

किंवा सूनमुखाच्या वेळी नवी सासु सुनेला मांडीवर बसवुन तिचे केस विंचरते असा काही एक विधी असतो ना तेव्हा सूने सोबत तिच्या आइचे पण केस विंचरुन द्यायचा विधी अ‍ॅड करा. >>>

नलीकडे अंगठी देताना काकूच्या तोंडावर बारा का वाजलेत?

दळाभद्री साळव्यांच्या घरातील एक तरी माठ कह्यात घेण्यासाठी तायडाने खोटा गुर्जी आणुन त्याच्या तोंडी तायडाला हवं ते ष्विटूचं भविष्य वदवून घेतलेलं असतं. त्या भविष्याची आठवण येत नलीच्या हाती अंगठी सोपवताना महामाठ काकूच्या तोंडावर १२ वाजतात.

नलीकडे अंगठी देताना काकूच्या तोंडावर बारा का वाजलेत? >> ते तर रोजच वाजलेले असतात हो...फक्त साडी आणी मेकअप सकट चे १२ होते काल....
दिग्दर्शकाच्या अचानक लक्षात आलं की काकु आणि काका ला फार कमी फुटेज आहे...काकु ला फक्त धाप लागणे आणि २ - ९ - ९ - २०० मोजणे आणि काका ला कहितरी चुकीचे उलट सुलट शब्द बोलणे आणि रेडिओ रीपेअर करणे इतकेच काम दिलंय....
आणि आता नलु अचानक हुश्शार झाली आहे ......तिला तायडा चे कट कळायला लागलेत मग कोणाला बरं बकरा करावं...आणि दादा वेडा
मग काय धरलाय काका काकी ला.... आधीच चेहेर्‍यावर १२ वाजलेले असतात...आता अजुन जरा क्लोज उप मधे दिसत आहेत दोघे...

फक्त साडी आणी मेकअप सकट चे १२ होते काल....>>

तो काका पेंग्विन सारखा का चालतो?किती बालिश character दाखवलं आहे त्याच

जाऊद्याहो. काय करेल बिचारा. महामाठ चिन्याचा वडिल साकारायचा असतो त्याला... असु द्या असु द्या.. साळव्यांकडे सगळे असेच आहेत. दळभद्रीपणामुळे असे वागतात ते. आपण एवढं बारकाईने लक्ष दिलं की आपल्याच डोक्याला ताप होतो.

नवीन प्रोमोमध्ये तायडीने नलूचा अवतार मस्त केलाय.

खरंय DJ.. माझा तर सात्विक संताप होतो

स्वीटूचा संगीत समारंभातली साडी आणि मेकप बघून , शाळेतल्या gathering मधल्या नाटकातली राणी आठवली. त्यामानाने पिवळ्या साडीत छान दिसतेयं.

रॉकी छान डान्स करत होता पण त्याच्या जोडीला महामाठ चिन्या कसा नाचत होता तो..... ओ गॉड.

आजचा भाग कोणी पाहिला का ? आज काय झालं ?? शेवटी काय माती खाल्ली सीरिअल वाल्या लोकांनी ?

काल शेवटचा एपिसोड होता का? काहीतीच विकृपणा होता सगळा.
स्विटू अन् मोहीतचं लग्न झालं.

कालचा महाएपिसोड हा नलीच्या महादळभद्रीपणाचा कळसाध्याय होता. नलीने काल त्यातल्या त्याल बरे केस विंचरले होते. अगदी थोडेच केस पिंजारलेले दिसले. तायडा मात्र भयंकर नटली होती. तिची साडी, ब्लाऊज अन गळाभर नेकलेस या संपुर्ण भारतीय पेहरावात तिचं एक वेगळंच सौंदर्य अन त्यामागे असलेला खुनशीपणा उठून दिसला. ष्विटू पण हिरव्या रंगाची साडी अन तिच्या आकाराला शोभणार्‍या सफेद खड्यांचा नेकलेस घालून मठ्ठपणे वावरत होती. माठ चिन्याला बरे कपडे देता आले असते पण ते राहिलं तर निदान अवतार तरी जरा बरा हवा असं वाटलं. महामाठ काका अन महामाठ काकी खरेच सुंदर दिसत होते. महामाठ काकीला थोडा मेकप अन चांगले कपडे घातले की ती खरेच चांगली दिसते असं वाटलं. कालच्या एपिसोड नंतर काकीला अजुन एखादी नवी शिरेल मिळेल असं वाटलं. ऑम्याची (नसलेली) तब्येत ढासळली आहे की केस वाढल्यामुळे सुका बोंबील दिसला ते काही कळालं नाही. दादा साळव्यांनी टायटल साँग मधलाच कुर्ता पायजमा घातला होता अन तोही मळवून ठेवला. या माणसाला घरात बंद करून का आले नाहीत ते कळालं नाही.

लेकीचं लग्न चालु असताना दादा साळवी तायडाच्या खेळीला बळी पडून आत्महत्या करायला जातात अन त्यांच्या मागे त्यांना वाचवायला ओम्या जातो. बाकी दळभद्री साळव्यांच्या असं काही घडलं असेल हे गावीही नसतं. ते लगेच स्वारगेट एस.टी. स्टँड वर असल्यासारखं ९ ची मुंबईला जाणारी बस आली नाही म्हणुन थोडी वाट बघण्या ऐवजी पलिकडल्या प्लॅटफॉर्म वर आलेली अन ९.०१ वाजता सुटणार्‍या सोलापूर बस मधे बसून सातारचं तिकिट काढु बघतात (अरे मुंबईला जायचं होतं ना तुम्हाला..? मग सोलापुरच्य एस.टीत बसून सातारचं तिकिट का काढताय माठांनो..? ) लग्नाच्या कार्यक्रमाला खुद्द नवरदेव ओम्या दिसत नाही, दादा साळवी दिसत नाहीत तर कमित कमी पोलिसात तरी तक्रार करायची ना.. पण दळाभद्री नली सर्वांसमक्ष रडून गोंधळ घालते अन मोहितशी लग्न लावते... आय मीन ष्विटूचं..!

तिकडे ओम्या दादा साळवींना कड्यावरून उडी मारताना वाचवतो त्या शॉटमधे दादा साळव्यांच्या ओझ्याने ओम्याची पण म्युच्युअल आत्महत्त्या होते की काय ही भिती वाटत असतानाच तिथं ३-४ जण येऊन दादांना वर खेचतात. मग हॉस्पिटल मधे नेतात (वेड्याच्या हॉस्पिटलात नेलं असतं तर बरं असच आपणाला वाटुन जातं..!) अन तिथं नस्रा अन डॉक्टराच्या ताब्यात दिल्यावर ओम्याला त्याच्या साखरपुड्याची आठवण येत दादा साळव्यांन एकट्यालाच तिथं सोडून तो पळ काढतो.

इकडे ठोकळा अभिनयात हातखंडा असलेल्या ष्विटुला मोहितने कुंकू लावून मंगळसुत्र घातल्यावर ओम्या तिथं धापा टाकत पोचतो अन मग ष्विटू उठून सर्वांसमोर स्तेज समोर थिजून उभ्या असलेल्या ओम्याकडे हत्तीसारखी दमदार पावले टाकत जाते. मग अंधार बुडुक होऊन इतर सर्वजण दिसेनासे होतात अन फोकस लँप ओम्या अन श्विटूवर रोखला जातो. मग शिरेलीच्या पहिल्या भागापासून आता पर्यंतचा गोड-गुलाबी प्रवास दाखवला जाऊन एपिसोड संपतो. (शिरेल नाही संपत... जोपर्यंट ८-८३० टाईमस्लॉटच्या नवेन शिरेलीचा प्रोमो दिसत नाही तोवर उगीच कोणी गोड गैरसमजात राहु नये )

शेवटचा भाग नसावा...

अर्थात 2 तासाच्या महा एपिसोड मध्ये काहीहीही चाललं होतं..

ओम च्या हातात ph असतो तरी त्याची आई,रॉकी कोणीही ph करून नीट खात्री करत नाहीत,की तो कुठे गेलाय, काय झालंय..?

आताच्या काळात पण,मांडवातून नवरा पळून गेला,मग बिचाऱ्या मुलीला दुसरं कोण स्वीकारणार, वगैरे...!!!

कुठल्या नशेत असले प्रसंग लिहतात कळत नाही
कहर आहे

डीजे, धन्यवाद इतक्या डीटेल्स साठी...बरे झाले काल बघितले नाही...त्यापेक्षा भावंडांसोबत नारळीभात खाण्यात वेळ छान गेला
आता झी५ वर पण बघायची गरज नाही इतका राडा...

झी च्या पेज वर लोक फार शिव्या घालत आहेत...तिथे फक्त मोहित शी लग्न झालं इतकचं कळलं होतं पण ते घडवुन आणण्यासाठी कायच्या काय लिहिलंय. मुलीचे वडील हा लग्नात इतका दुर्लक्षित घटक कसा काय असु शकतो ? कन्यादान वगैरे नसते का यांच्यात ? कन्यादान केल्याशिवाय मंगळसूत्र कसे काय बुवा घातले ? लेखकाचे बेसिक फारच कच्चे आहेत.
अजुनही "फक्त सही करुन, कागदपत्र एकमेकांना देउन" घर नावावर करण्याच्या ट्रॅक चा धक्का मला पचला नाहिये..त्यात आता हे नवीनच

बाकी झी पेज वर काही भाबडे लोक अजुनही या आशेवर आहेत की काल दाखवलेलं सगळं काका काकींचं स्वप्न आहे आणि अजुन लग्न होणे बाकी आहे...देव त्यांचे भले करो