पाककृती स्पर्धा १ - मोदक बनवणे - साक्षी

साहित्य
पारीसाठी-

१) २ भांडी (अंदाजे पाव किलो) बासमती तांदूळ पिठी - घरी करणार असाल तर बासमती तांदूळ धुवून, खडखडीत वाळवून पीठ करावे. मी तयार पीठ वापरते.
२) पीठा इतकेच पाणी
३) १ चमचा लोणी किंवा तेल
४) चिमूटभर मीठ

सारणासाठी-
५) २ नाराळांचा चव ( अंदाजे ३ भांडी) ताजा खोवला असेल तर उत्तम - खोबरं खोवताना चॉकलेटी, पाठीचा भाग घ्यायचा नाही. पांढरं शुभ्र खोबरं घ्यावं.
६) गूळ - २ भांडी (गोडाच्या आवडीप्रमाणे वाढवा/ कमी करा) चिरून किंवा जरा बारीक करून घ्यावा.
७) वेलदोड्याची पूड

कृती:
१) गूळ, खोबरं एकत्र करून मध्यम आचेवर ठेवावे. गूळ पातळ झाल्याने आधी सारण पातळ असेल. साधारण आठ ते दहा मिनिटात घट्ट होऊ लागले की झाले असे समजा. अधून मधून हलवत रहा. योग्य घट्ट झालं की त्यात वेलदोड्याची पूड घाला.
सारण आदल्या दिवशी करून फ्रीजमधे ठेवता येइल. मी सारणाचा फोटो काढायचा विसरले.

२) जाड बुडाच्या पातेल्यात पाणी घ्या. त्यात लोणी/ तेल आणि चवीपुरतं मीठ घाला. पाणी चांगले रटरट उकळले की पिठी घाला आणि भराभर हलवा. सगळं नीट मिक्स होऊ द्या. भरभर हलविण्यासाठी काविलथ्याची किंवा मोठ्या चमच्याची/ डावाची मागची बाजू जास्त बरी पडेल. आत्ता वर झाकण ठेऊन एक दणदणीत वाफ येऊ द्या आणि आच बंद करा. (अर्धा ते एक मिनिट.) जास्त वेळ राहिला तर उकड कोरडी होईल.

३) उकड गरम असतानाच तेल, पाणी लावून चांगली मळून घ्या. मी फूड प्रोसेसर वापरते. आता छोटा गोळा घेऊन तो परत छान मळून घ्या. उकड जितकी चांगली मळली असेल तितका मोदक वळायला सोप्पा. हाताला किंचित तेल लावून वाटी चा आकार द्यायला सुरुवात करा. सगळीकडून समान आणि पातळ पारी झाली की साधारण एक चमचा सारण भरा बोटांनी पारीच्या कडेवर निऱ्या घाला. जितक्या निऱ्या जवळ जवळ येतील तितका नंतर मोदक सुबक दिसेल. सगळ्या निऱ्या झाल्या की नाजूक हाताने त्यांना एकत्र करा. मोदक वळून पूर्ण करा.

४)पातेल्यात पाणी घेऊन वर चाळणीत मोदक ठेऊन वाफवून घ्या. भावाला बहिण हवी म्हणून करंजी पण करायची पद्धत आहे.
निर्‍या करताना...

असे सगळे मोदक करुन १५ मिनिटे वाफवून घ्या.

हे काही आकार केले त्याचे फोटो
गणपती, डबल मोदक आणि फोटो सेशन

मुरड घालून केलेला वाटीतला मोदक

२१ कळ्यांचा मोदक करताना आणि वाफवल्यावर

मोदक करंजी यांची अजुन एक मांडणी..

सगळे डिझायनर मोदक एकत्र