प्रवासाची दिशा वाहन ठरवते अनुभवांचे

जरी उडतात स्वच्छंदी थवे हे पाखरांचे
प्रवासाची दिशा वाहन ठरवते अनुभवांचे

तुझ्या माझ्यात पडलेली दरी समृद्ध झाली
किती होते सुपिक अवशेष खचल्या डोंगरांचे

नव्याने चढवले मजले जुन्या-पडक्या घरांवर
परंतू राहिले धोंडे बदलणे पायथ्यांचे

तुझ्या मजबूत खांद्यावर विसावे मान माझी
अशी पडतात स्वप्ने पण करू मी काय त्यांचे ?

शिखर गाठून गायबले कुठे....माहीत नाही
कधीचे शोधते आहे ठसे त्या पावलांचे

तुझ्या गावात आला ना अकाली पूर यंदा ?
हजारो शेर होते ते निखळल्या आसवांचे

जरा उतरव 'प्रिया' साशंकतेचा गूढ चष्मा
मळे दिसतील फुललेले तुला सदभावनांचे

सुप्रिया