मायबोली मास्टरशेफ - अरुंधती कुलकर्णी - बटाटा मुळा बीट बास्केट्स

मायबोलीवरच्या या स्पर्धेत भाग घ्यायचा हे जरी ठरवले असले तरी हाताशी असणारा वेळ, उपलब्ध घटक, संधी आणि जरासा निवांतपणा यांचा ताळमेळ बसून शेवटी मनात असलेला पदार्थ बनवायला अनंत चतुर्दशी उजाडली!
जो पदार्थ बनवायचा तो स्पर्धेच्या नियमांत बसणारा आणि हेल्दीही हवा असे मनोमन वाटत होते. तसेच हा पदार्थ करायला सोपा हवा हेही माझ्यासारख्या अपरिपक्व बल्लवाचार्यांच्या एकूण अनुभवावरून पक्के माहीत होते. मग त्याप्रमाणे मनात जुळणी सुरू झाली. सर्व घटक पदार्थ एकत्र जमवून त्यांची ही बास्केट किंवा गठडी वळताना मजा आली!

घटक पदार्थ :

बटाटा गाठोडे / बास्केटसाठी :

उकडून मऊसूत कुस्करलेले मध्यम आकाराचे बटाटे - ३
मसाला - मीठ, तिखट, हळद, जिरेपूड, धणेपूड
मिळून येण्यासाठी तांदळाची पिठी - १-२ चमचे
बास्केट घोळवण्यासाठी - भाजलेला जाडा रवा - २-३ चमचे

मुळा पालाभाजीसाठी :
मुळ्याचा हिरवागार पाला निवडून, धुवून चिरून
फोडणीचे साहित्य - तेल, मोहरी, हिंग, हळद, तिखट, हिरव्या मिरचीचा ठेचा, चवीनुसार मीठ, किंचित तेलावर परतून घेतलेले बेसन - ३ चमचे
मिळून येण्यासाठी - शिजून घोटलेली मूगडाळ - २-३ डाव

टॉपिंगसाठी :
अर्धे बीट उकडून सोलून किसून
अर्धा पांढरा मुळा किसून
वरून भुरभुरायला - मीठ, जिरेपूड, लिंबाचा रस

कृती :

बटाटे उकडून, सोलून त्यांचा लगदा करा व त्यात मीठ, तिखट, हळद, धणेपूड, जिरेपूड हा वर दिलेला मसाला करून एकजीव करा.

१]

२]

हवे असल्यास थोडा तेलाचा हात लावून त्याचे पोळीसाठी करतो त्यापेक्षा किंचित मोठे उंडे करून घ्या. या प्रमाणात २-३ उंडे होतील.

३]

एकेक उंडा हातात घेऊन त्याला जरा चपटा करा, भाजलेल्या रव्यात घोळवून तळहातावर ठेवून त्याला बास्केटचा आकार द्या आणि छोट्या नॉनस्टिक कढल्याला आतून तेल / तूप लावून ही बास्केट त्यात अलगद ठेवा व मंद आंचेवर भाजा. खूप भाजायची गरज नाही. गार झाल्यावर बाहेर काढून तिला परत थोडे हाताने एकसारखे करा.

४]

मुळ्याच्या पाल्याच्या भाजीसाठी कढईत तेल, मोहरी, हिंग, हळद, तिखट, मिरची ठेच्याची फोडणी करून त्यात मुळा पाला परता.

५]

६]

पाला शिजला की त्यावर तेलात भाजून घेतलेले बेसन शिवरा, चवीनुसार मीठ घाला.

७]

पालेभाजी मिळून येण्यासाठी २-३ डाव शिजवून घोटलेली मूगडाळ घालायला हरकत नाही. भाजी एकजीव करून झाली की गॅस बंद करा, भाजी गार होऊ द्यात.

अर्धा मुळा व अर्धे बीट किसून वेगवेगळ्या भांड्यांत ठेवा. त्यांत वरून मीठ, जिरेपूड, लिंबाचा रस मिसळून हलक्या हाताने मिसळा.

८]

९]

आता गार झालेली बटाटा बास्केट घ्या, त्यात हिरव्यागार मुळा पालाभाजीचे सारण भरा.

१०]

वरून किसलेले बीट व मुळा पेरा. अशा बास्केट्स तयार करून प्लेटमध्ये तयार करून ठेवू शकता.

११]

१२]

अधिक हौशी लोक मुळ्याची फुले, बीटची फुले करून आजूबाजूने रचू शकता. माझा धीर संपल्यामुळे मी त्या भानगडीत पडले नाही. बटाटा बास्केट करताना एक बास्केट रव्यात घोळवून व दुसरी बास्केट रव्यात न घोळवता करून पाहिली. रव्यात घोळवलेली बास्केट अर्थातच जास्त खमंग वाटते.

तर अशा या बटाटा मुळा बीट बास्केट्स दिसायला तर छान दिसतातच, खायलाही हेल्दी पर्याय म्हणून छान वाटतात. म्हटलं तर हा सायंकालीन नाश्त्याचा एक पदार्थ होऊ शकतो किंवा जेवणात सलादची जागा पटकावू शकतो.

पर्याय :
जाड्या रव्याऐवजी ब्रेडक्रंब्जमध्ये बटाटा बास्केटला घोळवू शकता.
वाफवलेले व मोड आलेले हिरवे मूग हेही वरून पेरू शकता.