मायबोली मास्टरशेफ - रायगड - मटार-मका, याम, बटाटा यांचे लसूणी कटलेट

याम ब्रेड करण्याकरीता याम आणायला गेले. ते अर्थातच जास्त आणले. मग याम ब्रेड करताना फ्रीज उघडून काही-काही काढताना मटार-मक्याचं फ्रोजन पाकीट नजरेस पडलं. डोक्यात म, य, ब,ल चा बुभूत्कार चालू असल्याने सर्वत्र त्या अक्षरांचे पदार्थ शोधणं वा आपसूक दिसणं होत होतं. मग म्हटलं जास्तीच्या यामचे मटार-मका घालून कटलेट्स बनवूया. अजून एक रेसिपी झाली पाकृ स्पर्धेत पोस्टायला आणि गोड याम ब्रेडच्या पुढून-मागून खायला काहीतरी तिखट-चमचमीत नको? तिसर्‍या मुख्य घटकाकरीता omnipresent अश्या गुणी बटाट्याचा आधार होताच (बीटही चालले असते पण घरी नव्हते) आणि मग चौथाही पदार्थ घालूच की - म्हणत लसूणी कटलेट्स बनवूया ठरवले. एरव्ही कटलेटस मध्ये आलं-लसूण पेस्ट घालतो, यावेळी फक्त लसणावर भर देऊया - असा विचार केला.

तर साहित्य :

मुख्य :
मका व मटार - १ वाटी प्रत्येकी - थोडे वाफवून
याम - १ नग
बटाटा - २ मध्यम
लसूण पाकळ्या - ३-४ (मोठ्या) वा ५-६ (लहान)

इतर :

आमचुर पावडर - १ ते २ टी स्पून
गरम मसाला - १ ते २ टी स्पून
मीठ, साखर - चवीनुसार
तेल - शॅलो फ्राय करीता
हवा असल्यास रवा - कटलेट्स घोळवण्याकरीता

कृती :

१. याम व बटाटे उकडून किसून किंवा हाताने मॅश करून घ्यावेत.
२. त्यात वाफवलेले मटार व मका घालावे. (पीठ होईल इतपत वाफवू नयेत. दाणे दिसावेत व लागावेत.)
३. लसून पाकळ्या बारीक चिरून घ्याव्यात. मी ते घरी एक लसूण कापायचं बारकं यंत्र आहे ते वापरलंय. तसंही ह्या गोष्टी आणून त्या मी नीट जपून सणासुदीलाच बाहेर काढते. ते काढलेलं यावेळी. (आयत्या वेळी सापडलं ही त्या गणोबाची कृपा!)) तो कापलेला लसून घाला.

४. त्यात आमचुर पावडर, गरम मसाला व मीठ, साखर - आवडीनुसार घालावे.

५. आवडत असल्यास थोडी कोथिंबीरही बारीक चिरून घालता येईल. (कोथिंबीर कापण्याचेही एक (उगीच) यंत्र आहे. पण कोथिंबीर संपली असल्याने त्याला सणासुदीलाही बाहेरची हवा दाखवली नाही!)
६. तर सर्व एकत्र करून कटलेटस वळून घ्या.

७. तवा गरम करा आणि शॅलो फ्राय करून घ्या.

सॉस (मॅगी हॉट अँड स्वीट मस्त लागतो) बरोबर गरमा-गरम खा!

तर दोन पदार्थ एकदम केल्याने जरा दमल्ये. तर आता पुढील स्वयंपाक घर भेट पुढील वर्षी गणपतीत!