आजवर ऐकून आहे मी असे

Submitted by बेफ़िकीर on 22 February, 2016 - 12:54

आजवर ऐकून आहे मी असे
चांगली असतात काही माणसे

लालसा ठरते....तिला हे सांगणे
की नको होऊस आता लालसे

वाटले भेटेल कोणी वेगळे
चेहरे सारे निघाले आरसे

टाळणे, टाळून वळुनी पाहणे
बघ तुला जमतात हल्ली साहसे

पदरही आभाळलेला भेटला
निथळली दुष्काळलेली धाडसे

वाट कवितेची रहस्यासारखी
काढली कोणी नि कोणाचे ठसे

सांगतो हासून कोणी हे मला
हासणार्‍यांचे इथे होते हसे

मी इथे बसणार आहे एकदा
पण इथे येतात काही कवडसे

ठेवले मी नांव माझे 'बेफिकिर'
जेवलो आहे स्वतःचे बारसे

-'बेफिकीर'!

विषय: 
काव्यलेखन
शब्दखुणा: 
आजवर ऐकून आहे मी असे
Groups audience: 
गुलमोहर - गझल
Group content visibility: 
Public - accessible to all site users
शेअर करा

गजल आवडली,
वाटले भेटेल कोणी वेगळे
चेहरे सारे निघाले आरसे

टाळणे, टाळून वळुनी पाहणे
बघ तुला जमतात हल्ली साहसे>>व्वा !

Submitted by vilasrao on 23 February, 2016 - 04:25

mast

Submitted by मृणाल १ on 23 February, 2016 - 06:16

छान!

Submitted by मानव पृथ्वीकर on 26 February, 2016 - 01:12

>>>आजवर ऐकून आहे मी असे
चांगली असतात 'काही' माणसे>>>मस्त!

>>>वाट कवितेची रहस्यासारखी
काढली कोणी नि कोणाचे ठसे>>>वाह् वा व्वा...बात है!

'कवडसे' ही मस्तच!
('एकदा'च हवंय,की 'एकटा'? टायपो तर नसावा?)

Submitted by सत्यजित... on 1 March, 2016 - 19:27

Back to top