एकेका शेरासाठी

Submitted by वैवकु रीटर्न्स on 9 April, 2015 - 12:11

वागणे शहाणे केले वाटणे दिवाणे केले
एकेका शेरासाठी मी लाख कुटाणे केले

मी आलो होतो तेंव्हा जिंकेन वाटले होते
मी हरलोसुद्धा नाही बस् येणे-जाणे केले

माझ्या चालीवर माझ्या देहाचा नाच बसवला
श्वासात भिनवली लय अन् जन्माचे गाणे केले

खोट्याच प्रतिष्ठेमध्ये ही हयात गेली माझी
मी खरेपणा शिकल्यावर वेगळे घराणे केले

कानांनी त्या गाजेचा मग रवंथ केला नुसता
मी लोकांच्या टाळ्यांचे बस् चणे-फुटाणे केले

इतकीच चूक केली की मी नाव घेतले नाही
ज्या कुण्या एकट्यावरती एवढे उखाणे केले

विषय: 
काव्यलेखन
साहित्य
Groups audience: 
गुलमोहर - गझल
Group content visibility: 
Public - accessible to all site users
शेअर करा

मी खरेपणा शिकल्यावर वेगळे घराणे केले <<<

ही ओळ आणि

इतकीच चूक केली की मी नाव घेतले नाही
ज्या कुण्या एकट्यावरती एवढे उखाणे केले<<<

हा शेर आवडले.

सहसा तुमच्या गझलेतील इतका कमी भाग आवडला असे होत नाही.

Submitted by बेफ़िकीर on 9 April, 2015 - 13:21

माझ्या चालीवर माझ्या देहाचा नाच बसवला
श्वासात भिनवली लय अन् जन्माचे गाणे केले

व्वा व्वा खतरनाक

गझल आवडली

Submitted by उगले इंद्रजित. on 10 April, 2015 - 03:55

बेफी +१

Submitted by डॉ.कैलास गायकवाड on 10 April, 2015 - 07:58

कवी नएकु,

ह्या शेरातील पहिल्या सुंदर ओळीचेही दुसर्‍या ओळीत चणे-फुटाणे झाले आहेत. (रवंथ - स्त्रीलिंगी)

कानांनी त्या गाजेचा मग रवंथ केला नुसता
मी लोकांच्या टाळ्यांचे बस् चणे-फुटाणे केले

कळावे

गं स

Submitted by गंभीर समीक्षक on 11 April, 2015 - 07:52

अरेछ्या लिंग बदलले गेले तर !
ओके सॉरी सॉरी ...बघू अजून काही सुचते का ते Sad धन्स गं स जी

_______________
असो
सर्वांचे आभार .इतक्याही प्रतिक्रिया मिळतील असे वाटले नव्हते Happy

बेफीजी विशेष धन्स ह्या गझलबाबत एकुणात माझेही मत आपल्यासारखेच आहे पण मला एक दोन ओळी अजून आवडल्यात काही शब्द देखिल आणि जमीन शब्दकळा भाषाशैली इत्यादी इत्यादी बाबीही बर्‍यापैकी जमून आल्यात असे वाटते

बाकी खयाल काही दिवसात प्रत्यक्ष झालेल्या घटनांमागूनन निर्माण झालेल्या विचारमंथनातून मला प्राप्त झाले ते मी माझ्यापुरते समाधानकारकपणे उतरवू शकलो असा फीलही मला या गझलेने दिला

असो पुढच्या गझलेत वेगळे प्रयत्न करीन आशिर्वाद असूद्यात
आणि हो ! शेवटचाच शेर विठ्ठलाचा आहे हे ओळखल्याबद्दलही स्पेशल धन्स

पुन्हा आभार सर्वांचे

Submitted by वैवकु रीटर्न्स on 11 April, 2015 - 11:16