अंबाडीची भाकरी

अंबाडीचे नाव काढता काहीजणांचे दात आंबत असावेत इतकी आंबट असते अंबाडी. पण भाकरीच्या पिठात मिसळून अंबाडीची भाकरी खाताना ह्या भाजीचा आंबटपणा जिभेला हवाहवासा वाटतो.

ह्या भाकरीची पाककृती लिहिण्यापुर्वी एक चित्र पाहूया ह्या भाजीचे आणि हे चित्र नेटवरुन घेतलेले आहे. नेटला धन्यवाद.

आता कृती:

साहित्य: अंबाडीची भाजी, तिखट हिरव्या मिरच्या, मीठ, जिरे

१) अंबाडीछी पाने निवडून धुवून घ्या:

२) मंद आचेवर एका पातेल्यात पाणी उकळयाला ठेवा आणि पाणी कोमट झाल की मगच ही निवडलेली पाने पाण्यात सोडा. पानी झिजली की ती तळाशी बसतात आणि पानांचा रंग आणखी गडद दिसायला लागतो. पाण्याला एक शेवाळी झाक यायला लागते. की समजून घ्यायचे आता आच बंद करायची.

३) ताव्यावर तेलात हिरव्या मिरच्या आणि जिरे अरत परत कराव्यात आणि मिरच्यातील बिया बाहेर येतील पण तव्यावरच राहतील ह्याची काळजी घ्यावी. हे करताना तेल वा एखादी बी डोळ्यात उडणार नाही ह्याचीही काळजी घ्यावी. जिरे सहसा मोहरीसारखे उडत नाही. हे सर्व करुन झाले की ह्या मिरच्या पोळपाटावर किंवा पाट्यावर रगडून घ्याव्यात.

३ ला दुसरा पर्यायः

३) भाजी शिजवतानाच त्यात मिरच्या घालायच्या. दोन्ही एकत्र मऊ शिजतात. आणि मग भाकरीचे पिठ मळवताना पिठाशी मस्त एकजीव देखील होतात.

४) ज्वारीच्या पिठामधे आधी चमचाभर मिठ घालायचे. अंबाडीच्या भाकरीला जरा जास्तच मिठ लागत. मिठ कमी घातली की हवी तशी चव येत नाही भाकरीला. पिठामधे एक खळ करुन पातेल्यातील ऊन ऊन पाणी थोडे थोडे सोडायचे आणि सराट्यानी पिठ, पाणी आणि भाजी एकत्रित एकजीव करुन हाताला गार पाणी लावून समांतर पसरवून घ्यावे. एकदमच खूप पाणी टाकले की पिठाचा उंडा पातळ होऊ शकतो. तेंव्हा थोडे थोडे घालून त्याला एकजीव करत राहावे.

एकजीव झालेला भाकरीचा उंडा असा दिसतो:

५) आता एक मेणकापड घेऊन ते पोळपाटावर ठेवून भाकरी थापावी:

६) ताव्यावर भाकरी टाकण्यापुर्वी भाकरी थापतानाच तावा चुलीवर ठेवावा. तापलेल्या ताव्यावर अलगद हाताने भाकरी टाकावी.

७) भाकरी दोन्हीबाजूनी कडेपर्यंत खरपूस भाजून शेकून घ्यावी:

ही झाली अंबाडीच्या भाकरीची कृती. ह्यामधे तुम्ही बदल करु शकता. जसे की थालीपिठाप्रमाणे ह्यात इतर साहित्य घालू शकता. किंवा हिवाळ्याचे दिस असतील तर तिळ घालू शकता. तेल कडेकडेला सोडून भाकरीची पोळी करु शकता. जशी तुमची चव. .तसे तुमचे बदल!!!