''जगाला दावण्यासाठी तरी तू घाव मोठा दे''

Submitted by डॉ.कैलास गायकवाड on 11 April, 2014 - 02:40

जरी मोठा न आवाका जिवाला आव मोठा दे
( नको छोटे शहर वसण्याकरीता गाव मोठा दे )

शिकस्तीने जराशा जाहले हतबल जगज्जेते
पराभव काय असतो जाणण्या पाडाव मोठा दे

नको टोचूस वारंवार जखमाही दिसत नाहित
जगाला दावण्यासाठी तरी तू घाव मोठा दे

कसा सल काळजामधला कुण्या ओळीमधे मांडू
लिहाया वेदना सारी पुरेसा ताव मोठा दे

पुरे झालीत सारी आडवळणे जीवनामधली
सहल संपायला रस्ता जरा भरधाव मोठा दे

कधी जिंकायचा ''कैलास'' नाही,जाणतो आहे
पराभुत व्हायच्या साठी तरी तू डाव मोठा दे

-- डॉ.कैलास गायकवाड

विषय: 
काव्यलेखन
शब्दखुणा: 
मराठी गझल
Groups audience: 
गुलमोहर - गझल
Group content visibility: 
Public - accessible to all site users
शेअर करा

mastach

Submitted by yogesh shinde on 11 April, 2014 - 06:59

शिकस्तीने जराशा जाहले हतबल जगज्जेते
पराभव काय असतो जाणण्या पाडाव मोठा दे<<< शेर आवडला.

(शेवटच्या शेरात पराभुत असे हवे आहे ना?)

Submitted by बेफ़िकीर on 11 April, 2014 - 07:02

पाडाव सर्वात जास्त आवडला
ताव ,,,'कागदाचे ढीग संपावे तरी उरते कधी' ..हा शेर आठवला
घाव पण छान
इतर शेरही आवडलेच (मतला जरा कमी )

Submitted by वैवकु on 11 April, 2014 - 07:19

काही शब्दवापर खटकले उदा. करीता, जाहले
(...) च्या उद्देश्य लक्षात आला नाही.

रस्त्याचा, शिकस्तीचा शेर छान.

Submitted by समीर चव्हाण on 12 April, 2014 - 00:28