प्रॉन्स मसाला

आई मुंबईची त्यामुळे उन्हाळ्याच्या सुट्ट्या आल्या की मामाकडे मुंबईला जायचं हे ठरलेलं होतं. बिचार्‍या बाबांची कामं मात्र चालूच असायची त्यामुळे ते आम्हाला घ्यायला सुट्टीच्या शेवटी चार-पाच दिवस आले तर यायचे. मुंबईत मनसोक्त हुंदडताना, मजा करताना बाबा आपल्याबरोबर नाहीत याचं मला थोडंफार शल्य वाटत असे. आईमागे बाबा नीट जेवत असतील की नाही, त्यांना चहा-पाणी कोण बघत असेल असे प्रश्न मला नेहेमी पडायचे. आई मात्र माहेरपण आणि सुट्टी पूर्ण एंजॉय करण्याच्या मूडमध्ये दिसायची.
एके सुट्टीत मी काहीतरी कारणामुळे बाबांबरोबर मागे राहिलो. आई आणि भावाला गाडीत बसवून निरोप देताना आता मला एरवी बाबांबद्दल पडणारे खाण्या-पिण्याचे प्रश्न स्वतःबद्दल पडून जास्तच भीषण वाटायला लागले. सुट्टीला न गेल्याबद्दल रुखरुख होतीच.
स्टँडवरून परत येता येताच बाबांमध्ये लक्षणीय बदल होऊ लागले. चेहर्‍यावर 'शिकन' की काय म्हणतात ती आणून आईला टा-टा करणारे बाबा घरी येताना चक्क शीळ वाजवत गाणे गुणगुणत होते.
कुठेही फिरायला न जाऊनही ती सुट्टी माझ्यासाठी धमाल ठरली. वूडहाऊसच्या एका पुस्तकात 'He revived like a watered rose' असे वाक्य आहे. त्या सुट्टीत बाबाही मला असेच नुकते पाणी घातलेल्या गुलाबासारखे ताजेतवाने भासत होते. सगळ्यात बहार होती ती खाण्यापिण्याची. चिकन, मटण, मासे या त्रिसूत्रीशिवाय जेवायचे नाही अशी प्रतिज्ञा घेतल्यासारखे बाबा रोज नवनवे पदार्थ बनवत होते. ते आणि त्यांचे समभावी तीनचार मित्र यांचा हुडदंग बघून मला एक वेगळे बाबा वावरत असल्याची अनुभूती मिळाली. यापुढे माझा सुट्टीत आईबरोबर जाण्याचा उत्साह बराच कमी झाला . मामाच्या गावाला जाऊन गुलाबजामून खाण्यापेक्षा (पहा: मामाच्या गावाला जाऊया बालगीत) स्वतःच्या गावात राहून चिकन, सी-फूड खाण्यात जाम मज्जा आहे हे कळण्याइतका मोठा मी नक्कीच झालो होतो.
त्या धमाल काळात बाबा करीत असलेल्या एकसेएक लई-भारी संपूर्ण सामिष डिशेसपैकी प्रॉन्सची एक हातखंडा डिश-रेसिपी आज देत आहे.
----------------------------------------------------------------------------
साहित्य :

प्रॉन्स १५-२० मीडियम साईझ
ओला नारळ - एक वाटी खवून,
नारळाचे दूध पाव वाटी (ऑप्शनल), टोमॅटो - पाव बारीक चिरून (ऑप्शनल)
कांदा - दोन मोठे लांब चिरून, एक मध्यम बारीक चिरून
लवंग - ३-४, मसाला वेलदोडे - २, बडीशेप- एक टीस्पून, धणे - एक - दीड टेस्पून, दालचिनी- छोटा तुकडा, लसूण - ३-४ पाकळ्या
हळद - १/२ टेस्पून
तिखट - दोन टे स्पून किंवा जितके तिखट चालते त्यानुसार
आमसुले (कोकम) ४-५
मीठ, तेल ई.
कृती

प्रॉन्सना हळद - मीठ लावून ठेवा.
तेलात लांब चिरलेला कांदा, लसूण, टोमॅटो (ऑप्शनल), मसाले आणि नारळ घालून न जळता पण खरपूस असे रोस्ट करून घ्या.

रोस्ट मिश्रण गार झाल्यावर मिक्सरमधून थोड्याश्या कोमट पाण्याबरोबर बारीक वाटून घ्या.

पॅनमध्ये तेल गरम करा. बारीक चिरलेला कांदा पारदर्शक होईपर्यन्त फ्राय करा. हळद - तिखट घाला. थोडे परतून मसाला पेस्ट घाला. चांगले परता. ३-४ मिनिटांनी प्रॉन्स घाला. मध्यम आचेवर ४-५ मिनिटे परता. प्रॉन्स शिजायला लागले की २-३ चमचे पाणी घाला, मिश्रण एकजीव करा, चवीनुसार मीठ घाला. आमसुले घालून प्रॉन्स शिजू द्या. किंचित उकळी आली की आंच धीमी करून आवडत असेल तर नारळाचे दूध घालून फिनिश करा. प्रॉन्स कोट होतील इतकाच अंगाबरोबर रस्सा ठेवायचा आहे.
मनपसंत सजावट करून सर्व्ह करा.