अमेरिकेतील निवडणुका - २०१२

यावर्षी अमेरिकेत अध्यक्षीय निवडणुका होतील. रिपब्लिकन पक्षातर्फे 'मिट रॉमनी' उमेदवार म्हणून निवडणूक लढवतील असं (जवळपास) निश्चित झालं आहे. त्यांचे उपाध्यक्षपदाचे उमेदवार कोण असतील/असावेत यासाठी नुकत्याच मायबोलीवर घेतलेल्या सर्व्हेत भाग घेणार्‍यांचे आभार. मायबोलीकरांनी (प्रचंड) बहुमताने 'बॉबी जिंदल' (आर्च, आडनाव बरोबर लिहिलंय का?) यांना निवडले. त्यांच्या खालोखाल कॉंडालिझ्झा राईस (नाव ऐकलेलं आहे, द्या ठोकून!) यांना मते मिळाली.

हे रॉमनी यांना कळवायचे आहे, पण ते एक 'तु.क.' टाकतील. म्हणजे तुम्ही शेवटी निवडून कोण निवडणार? भारतीय वंशाचे आहेत म्हणून जिंदल! तश्या निक्की हेलीसुद्धा भारतीय वंशाच्या आहेत पण ते मत देणार्‍यांना माहीत नसणार. कारण एकूण सूचना धुडकावणे, न वाचता काहीही लिहिणे आणि कशालाही मत देणे हे प्रकार घडले त्यावरुन एकतर हे भारतातले मतदार असावेत किंवा डेमोक्रॅट्स असा अंदाज आहे. (यांना शिस्त म्हणून नाही!)

काही अन्-एन्जेकरांनी ख्रिस ख्रिस्टीना मत दिले आहे. खर्‍या एन्जेकरांना माहीत आहे की त्यांना उपाध्यक्ष होण्यात इन्टरेस्ट नसून अध्यक्षच व्हायचे आहे. ते वजन कमी होईपर्यंत वाट बघणार आहेत. (चमन आणि बुवा, तुम्हाला संधी आहे. ट्रेनरसाठी अर्ज करुन पहा).

हिस्पॅनिक मते मिळवण्यासाठी खरं तर यावेळी हिस्पॅनिक उमेदवार असण्याची शक्यता आहे असं आपलं म्हणतात. यात तथ्य आहे. 'सुझॅना मार्टिनेझ' हा चांगला पर्याय आहे. पण या फारश्या कोणाला माहीत नाहीत. तुम्ही तिकडे वाळवंटात किंवा आसपास रहात असाल तर नाव ऐकले असेल असे कुठेतरी वाचले. (म्हणूनच श्री ला त्या बरोब्बर माहीत होत्या!). 'मार्को रुबियो' हासुद्धा असाच अजून एक पर्याय. तो फारच तरुण आहे हे लोकांना झेपत नाही कारण तो फ्लोरिडाचासुद्धा आहे.

असो. तर आपण एक निर्णय देऊन मोकळे झालो आहोत. आता पुढील चर्चा सुरु करु. अमेरिकेतील निवडणुका - २०१२ याबद्दल काहीही चर्चा इथे करता येईल. तसेच या निवडणुकीत काही अर्थ नाही असे वाटत असल्यास 'ओबामाज सेकन्ड टर्म अ‍ॅन्ड बियॉन्ड' हेसुद्धा चालेल.

करा तर मग सुरुवात!

गॉड ब्लेस अमेरिका!