पापणी

गूज पापणीचे सांगू कसे?
©️ चन्द्रहास शास्त्री

आत ओली बाहेर कोरडी, गूज पापणीचे सांगू कसे
आत जागी नि बाहेर जागी, गूज पापणीचे सांगू कसे

साथ पापणीची निस्स्वार्थ ही, ती फक्त तेवती पणती नसे
बरोबरी तिची कुणास नाही, गूज पापणीचे सांगू कसे

सरींना मुक्त ओघळू द्यावे, तिलाही वाटले असेल असे
इमान तिने मोडले ना कधी, गूज पापणीचे सांगू कसे

विजेने ढगास जपावे तसे, अहंकार माझा जपला असे
एकांती पण ओली होतसे, गूज पापणीचे सांगू कसे

निमिषा, छानच तुझी रे घरटी, स्पन्दनाने होतसे बोलकी
बूज राखून सांगितले असे, गूज पापणीचे सांगू कसे