एक 'उन्हाळ' दिवस

आठेक दिवसांमागं ग्रीष्म सुरु झाला होता. आज सकाळ पासून फिरत होतो. नवाच्या सुमाराला उन्हं बम तापली. फांद्यांचे खराटे आणि सुकलेल्या बांबूच्या काड्या हे सारं सकाळी सकाळी मोठं फोटोजेनिक वाटत होतं, आता ते सारं रखरखीत वाटू लागलं. धुळभरल्या रस्त्यावर गिचमीड ओरखड्यांसारख्या या सुकल्या फांद्यांच्या सावल्या दिसू लागल्या. उन्हानं कुरतडलेल्या या अशा फाटक्या सावलीचाही उन्हाळ्यात मोठा आधार वाटतो. पण रानात थकल्यावर खरी विश्रांती इथं-तिथं पसरलेल्या मोह, बेहडा, कुसमाच्या लाल-हिरव्या झाडाखालीच.