वळणांची येऊन दया

गझल - वळणांची येऊन दया

वळणांची येऊन दया मी सतत वळालो होतो
त्यामुळेच हे समजत नाही, कुठे निघालो होतो

मनामनाला जपायची बस वृत्ती होती माझी
माफ करा मी चुकून तुमच्या जगात आलो होतो

तहानलेल्यांमध्ये पडलो सदा एकटा ... कारण
तहान लागावी यासाठी व्याकुळ झालो होतो

हा खाली दिसतच नाही या खुशीत हसले सारे
मीही हसलो, मी त्यांच्या वरतून उडालो होतो

'सोड तुझा बालीशपणा जर पुढे जायचे असले'
तुला म्हणालो होतो मी हे तुला म्हणालो होतो

'बेफिकीर'च्या गझलांच्या व्हर्जनवर जगले वेडे
नभ मिळते धरतीला, मी तेथेच मिळालो होतो

=====