गझल - पत्रकारिता स्वस्त जाहली आहे
Submitted by बेफ़िकीर on 2 January, 2019 - 08:19
गझल - पत्रकारिता स्वस्त जाहली आहे
=====
तिच्यामुळे ही तेढ वाढली आहे
पत्रकारिता स्वस्त जाहली आहे
प्रत्येकाचा देव वेगळा येथे
प्रत्येकाची वाट लागली आहे
एक कधीही नव्हता माझा भारत
ब्रिटिशांनी ठासून मारली आहे
घोड्यावर संसार बांधती धनगर
समानता बस मेंढी शिकली आहे
मूतखडा सोसतात अजुनी पोरी
शाळेची बाथरूम सडली आहे
लग्नामध्ये एक कोट घालवले
वर्षांमध्ये लेक परतली आहे
कितीजणींना सांगू, सोडा चिंता
एक प्रेयसी फक्त वाढली आहे
जी गंगा बाहेर उसाने नेली
कांद्याने डोळ्यात आणली आहे
विषय:
शब्दखुणा:
