गझल - एक हत्ती

गझल - एक हत्ती
=====

एक हत्ती अणुस्करामध्ये
माणसे आपल्या घरामध्ये

कृष्णविवरे अनेक टपलेली
आपल्यातील अंतरामध्ये

एक डुबकी तुझ्यातली म्हणजे
एक घुसमट सरोवरामध्ये

हे तुझे आत ये मला म्हणणे
काय आदर, अनादरामध्ये

प्रेमगाथा अपूर्ण नसत्या तर
मीठ नसतेच सागरामध्ये

झाड, कर्जे नि दोर एखादा
काय होणार वावरामध्ये

व्यावसायिकपणे म्हणू, ते, जे?
बोललो भावनाभरामध्ये

मालकी 'बेफिकीर' नाकारे
पण अटीट्यूड चाकरामध्ये

=====

-'बेफिकीर'!