बदलायला शिक

बदलायला शिक

कधी कधी घडते ते स्विकारायला शिक
मनासारखे घडेलच असे नाही
मुरड मनाला घालायला शिक
पुढे चाल, जसे काही घडलेच नाही

क्षीण होता गात्र कधी
चड फड तू करु नकोस
दगडावर डोके आपटून
कपाळमोक्ष होऊ नकोस

रक्तबंबाळ होशिल तू
दया कोणा येणार नाही
एकटयाने जखमा बांधणे
आत्ता तुला जमणार नाही

जग बदलू नाही शकत
स्वत: बदलायला शिक
माघारीत हार नसते
उर्जा भविष्यासाठी राखायला शिक

दत्तात्रय साळुंके