तुला सांभाळण्याचा केवढा वैताग चारित्र्या

गझल - तुला सांभाळण्याचा केवढा वैताग चारित्र्या

तुला सांभाळण्याचा केवढा वैताग चारित्र्या
जसे वागायचे आहे तसे तू वाग चारित्र्या

तुझ्यावाचून आता मी इथे नावाजला जातो
नको काढायला येऊस माझा माग चारित्र्या

मला ती जाळते हल्ली तिच्या भुरट्या कटाक्षांनी
जरा सांभाळ......ना लागो तुलाही आग चारित्र्या

कुणालाही कुणीही पाडते प्रेमात आताशा
तुझा अख्ख्या जगाला येत आहे राग चारित्र्या

उपाशी राहण्यासाठी स्वतःचे गोडवे गा तू
प्रतिष्ठा लाभण्यासाठी स्वतःला त्याग चारित्र्या

कधी समजेल की वेड्या तुझा मी फक्त पोशिंदा
गुणाकारास पेल्यांच्या नशेने भाग चारित्र्या