मभागौदि २०२५ शशक- मदमस्त - हरचंद पालव

Submitted by हरचंद पालव on 23 February, 2025 - 07:29

ग्रीष्मातल्या माध्याह्नी तळपणार्‍या रश्मीकराचे प्रकाशबाण त्या ताटकळलेल्या पथिकांच्या सर्वांगांना घायाळ करत होते. श्रांत पांथांनी त्यांपासून संरक्षणाकरिता आम्रतरू आणि जम्बुफलवृक्षांनाच आपल्या ढाली केल्या आणि 'त्या'ची प्रतीक्षा करत ते तिथेच सैलावले. इतक्यात दूरवरून 'तो' धरणीव्योम कंपित करणार्‍या जडसंथ गजपावलांनी मार्ग क्रमताना दृष्टोत्पत्तीस पडला. 'त्या'ला पाहून सर्वच जण सरसावले व आपापल्या तरुछायेतून बाहेर येत उत्कट अपेक्षांच्या भाराने अल्पसे वाकून उभे राहिले. समीप येताच आपल्या अर्धोन्मिलित नेत्रच्छदांच्या आडून 'त्या'ची दिठी सभोवारच्या व्याकुळ जनसमुदायावर भिरभिरली. जिव्हाग्रावर आलेली शिवी 'त्या'ने क्षणभर गिळून टाकली. 'त्या'च्या तप्तमुद्रांकित मुखमंडळातून सप्तजिव्हा फुत्काराव्यात त्याप्रमाणे रक्तवर्णी तुषार भुईवर उडाले आणि पाठोपाठ आपल्या खर्जगंभीर ध्वनीत मदमस्त होत्साता 'तो' उद्गारला, "डायवर कोने? लायसन बगू."

विषय: 
उपक्रम
शब्दखुणा: 
उपक्रम शशक
Groups audience: 
मराठी भाषा गौरव दिवस २०२५
Group content visibility: 
Use group defaults
शेअर करा

Lol भारीच!
मला वाटतोय तो ' तो ' नक्की नसणार पण कोण असेल विचार करताना हे असतील अशी पुसटशी शंका ही आली न्हवती. Lol

Submitted by अमितव on 23 February, 2025 - 07:37

छान!
पहिल्या एक दोन वाक्यात च जाणवलं बहुतेक म्हैस विषयीच असणार ! Happy

Submitted by छन्दिफन्दि on 23 February, 2025 - 10:02

काल पासून मराठी शब्दकोश घेऊन बसलो आहे. आता वाचून संपली. तरीही नाही कळली Sad

कुठला आधीचा/दुसरीकडचा संदर्भ आहे का कथेला?

Submitted by ऋन्मेऽऽष on 24 February, 2025 - 00:25

भारी Lol
हर्पा style शब्द आहेत सगळे
.
काय माहिती म्हशीबरोबर गटणे आठवला

Submitted by किल्ली on 24 February, 2025 - 01:11

खूपच छान.
सुबक ठेंगणी आणि मधु मलुष्टे घुसडायचे होते कुठे तरी!

श्रांत पांथांपैकी एक गौरवर्ण ललना आणि एक सापेक्ष नवयुवक यांच्यातील विशेष मैत्र जनांच्या नजरेतून निसटले नव्हते. Lol

Submitted by छल्ला on 24 February, 2025 - 01:25

श्रांत पांथांपैकी एक गौरवर्ण ललना आणि एक सापेक्ष नवयुवक यांच्यातील विशेष मैत्र जनांच्या नजरेतून निसटले नव्हते>>> Happy
आवडलं

Submitted by छन्दिफन्दि on 24 February, 2025 - 01:38

छल्ला Lol Lol

ऋन्मेष Happy म्हैस ऐक नक्की. युट्यूबवर आहे. माझं नाव पण सापडेल त्यात.

Submitted by हरचंद पालव on 24 February, 2025 - 02:47

भारी Lol

Submitted by मानव पृथ्वीकर on 24 February, 2025 - 07:35

हर्पा Biggrin

Submitted by स्वाती_आंबोळे on 24 February, 2025 - 08:58

श्रांत पांथांपैकी एक गौरवर्ण ललना आणि एक सापेक्ष नवयुवक यांच्यातील विशेष मैत्र जनांच्या नजरेतून निसटले नव्हते >>> Happy हे पण भारी आहे "सापेक्ष" चा असा चपखल वापर पहिल्यांदाच वाचला Happy

जुन्या माबोवर अक्षरे लपवायची सोय होती. म्हणजे तेथे कर्सरने सिलेक्ट केली, की मगच दिसत असत. या कथेतील शेवटचे वाक्य लपवायला फार उपयोगी पडली असती ती सोय. म्हणजे बाकी वाचून झाल्यावर ते "रिव्हील" होतील असे काहीतरी Happy

Submitted by फारएण्ड on 24 February, 2025 - 14:40

क्या बात है, भई व्व्व्व्व्व्व्व्व्व्व्व्व्व्व्व्व्व्व!! हरचंद पालवा, सिंपली फँटाष्टिक Happy दाद द्यायला म्हणून लॉगिन करतोय. खरं म्हणजे अक्षरशः परवाच लाँग ड्राईव्ह वर 'म्हैस' ऐकलं होतं. पण शेवटपर्यंत पत्ता लागला नाही.

Submitted by सभासद on 24 February, 2025 - 19:13

सिक्सर ठोकली हर्पा. शेवटचं वाक्य वाचून ठ्या करून हसायला आलं. रक्तवर्णी तुषार भूमीवर उडाले म्हणजे एग्झिबीट नं १. रक्त. मग सगळंच ऐकू आलं, रक्त?? तुमचा तो आर्डर्ली पान खाऊन पचापचा थूंकलाय. Lol बाकी अमितव म्हणला तसं शेवटपर्यंत पत्ता लागू दिला नाहीत हां.

Submitted by धनुडी on 26 February, 2025 - 05:42

मस्त मस्त.

विचार करताना हे असतील अशी पुसटशी शंका.......+१.

Submitted by देवकी on 3 March, 2025 - 11:51

Pages