वन डिश मिल - राजमा सलाड - { अल्पना}

साहित्य -
सलाड साठी -अर्धी वाटी राजमा ( नुसत्या राजमा ऐवजी राजमा+ चवळी पण घेता येईल), अर्धी वाटी वाफवलेले स्वीट कॉर्न, बारीक चिरून लाल, पिवळी आणि हिरवी सिमला मिरची ( सगळ्या मिळून एक -दिड वाटी), एक कांदा बारीक चिरून, एक टोमॅटो बारीक चिरून, हवे असल्यास ऑलिव्हज

खाकरा नाचोज साठी -दोन तिन शिळे फुलके, थोडं तेल, मीठ, गरम मसाला /तिखट / पिरी पिरी सिझनिंग

ड्रेसिंग साठी - एक हिरवी मिरची बारीक चिरून, थोडे चिली फ्लेक्स, लाल तिखट, जीरा पावडर, मिऱ्याची पूड, मीठ, अर्ध्या लिंबाचा रस, आंबट पणा बॅलन्स करायला थोडी साखर किंवा पंजाबी शक्कर / गुळाची पावडर, एक दोन लसणाच्या पाकळ्या क्रश करून ( आले किसायाच्या छोट्या किसणीने किसून घेतल्या), ३-४ चमचे एक्स्ट्रा व्हर्जिन ऑलिव्ह ऑइल, भरपूर बारीक चिरलेली कोथिंबीर

कृती:
राजमा ३-४ तास पाण्यात भिजवून, थोडं मीठ घालून कुकरमध्ये व्यवस्थित मऊ शिअजवून घ्यावा. तुमच्या घरी राजमा शिजत नसेल तर राजम्याऐवजी चवळी घ्या. इथला राजमा १५-२० मिनिटांत छान शिजतो.
एक बोल मध्ये शिजवलेला राजमा (त्यातलं पाणी घेवू नका.), वाफवलेले स्वीट कॉर्न आणि बारिक चिरलेल्या सगळ्या भाज्या एकत्र करा.
ड्रेसिंग साठीचे सगळे साहित्य एकत्र करा आणि चमच्याने फेटून घ्या. जास्त प्रमाणात करणार असाल तर ब्लेंडरनी पण फेटता येईल.
काल माझ्याकडे कोथिंबीर नव्हती म्हणून घातली नाही. पण कोथिंबीर घालाच भरपूर. चवीत खूप फरक पडतो. हे ड्रेसिंग सलाडमध्ये मिक्स करा. वरून हवे असल्यास थोडे पिकल्ड ऑलिव्ह्ज घाला.
खाकरा नाचोज करायला फुलक्यांचे त्रिकोणी तुकडे करून घ्यावेत. एका फुलक्याचे आठ तुकडे होतात. तव्यावर २-३ थेंब तेलात हे तुकडे दाबून दोन्ही बाजूंनी कुरकुरित होईपर्यंत शेकावे. एका प्लेटमध्ये हे तुकडे काढून त्यावर थोडे मीठ, तिखट आणि आवडीचा मसाला भुरभुरावा. मी किचन किंग मसाला भुरभुरला होता.
सर्व्ह करताना बोल मध्ये मध्यभागी सलाड आणि बाजूने हे खाकरा नाचोज असे सर्व्ह करावे.

अधिक टिपा:
यात पिकल्ड हालपिनो घातल्या तर छान लागतात. माझ्याकडे नव्हत्या. मी एरवी या सलाड मध्ये लिंबाच्या रसाऐवजी एक दिड चमचा रेड वाइन व्हिनेगर घालते.
तुम्हाला तिखट आवडत असेल तर ड्रेसिंग मध्ये थोडे पिरी पिरी सिझनिंग / पिरी पिरी केचप किंवा हॉट सॉस घातलेला खूप छान लागतो. मी सध्या विकतचे सॉस वापरणं खूप कमी केल्याने घातला नाही.
तेलाऐवजी खाकरा करताना गार्लिक बटर वर किंवा साध्या अमुल बटर वर शेकला तर जास्त चांगला लागतो. फुलक्याचे खाकरा नाचोज न बनवता, बाजारातले नाचोज पण खाता येतिल याच्याबरोबर.

हा एक याच सलाड चा जुना फोटो.