आरोग्यवर्धक पेय- अमृतदूध - SharmilaR

Submitted by SharmilaR on 7 September, 2024 - 01:08

आरोग्यवर्धक पेय- अमृतदूध


खरंतर अमृतदूध ही द्विरुक्ती होतेय, कारण पुरेसं पोषणमूल्य असणारं दूध हेच मुळात अमृत आहे. पण ह्या अमृतासमान असलेल्या दुधाची चव आणखीन वाढवणं, हा अमृतदुध पेयाचा उद्देश!

मला स्वत:ला तर हे पेय एवढं.. एवढं.. आवडतं, की निव्वळ ‘आता ते प्यायला मिळणार’ हेच माझं पहाटे लवकर उठण्याचं motivation असायचं (नोकरीत असतांना सकाळी सातच्या आत घराबाहेर पडायला लागायचं).

कृती अतिशय सोपी आहे. (म्हणजे इतकी सोपी की, कुकर पण नं लावता येणारा नवरा.., बाहेरगावी एकटी राहणारी मुलं.. कुणीही ते करू शकतं.) करायला सोपं.., आरोग्यवर्धक.., चव अफलातून.., शिवाय पोटभरीचं! एक मोठा कप/पेला अमृतदूध घेतलं, की नंतर जेवणाच्या वेळेपर्यंत खायला प्यायला इतर काही नसलं तरीही चालेल.

तर करूया सुरवात-
रात्री झोपण्याच्या आधी आठवणीने चार-पाच मनुका, एक सुका अंजीर, चार बदाम पाण्यात भिजत घालायचे.

सकाळी (ब्रश करून झाला की, चहा करता करता) एका मोठ्या कपात/पेल्यात हा अंजीर, मनुके, आणि बदाम (हे सोलून, त्यामुळे पोषणमूल्य वाढतं) घ्यायचे. ज्या पाण्यात हे सगळं भिजत घातलं होतं ते पाणी (सटकन किंवा वेळ असल्यास चवी चवीने) पिऊन टाकायचं. (म्हणून ब्रश करून झाला की.. असं सांगितलं. बाकी उपाशी पोटी अंजिराचं पाणी पिण्याचे अनेक फायदे अधिक जाणकार लोकं सांगू शकतील.) हे अंजिराचं पाणी अतिशय चवदार असतं. (पण हे बायप्रॉडक्ट आहे. एक पेय करता करता दुसरं आपोआपच मिळतं!)

आता त्यातच (म्हणजे त्या मोठ्या कपात/पेल्यात! पाण्यात नाही. ते झालय पिऊन!) चार-पाच खजूर (धुवून, बिया काढून) टाकायचे. हे खजूर उत्तम प्रतीचे.. काळे.. लुसलुशीत.. असल्यास दुधाची चव अधिक बहारदार येते. आता त्यावर कपभर गरम दूध टाकायचं (आठवतंय.., तुम्ही चहा करत आहात!). आवडत असतील तर थोडे काजूही घालू शकता वर.

आता तुमचा चहा पिऊन आंघोळ वगैरे होईपर्यंत दुधात खजूर आणी अंजीर वगैरे मस्त मुरले असतात. दूधही पिण्याइतपत कोमट झालेलं असतं. तर आता मस्त मोठया चमच्याने त्याचा आस्वाद घ्यायचा. अ.. हा.. हा..हा.. हा..!!!!

हे खजुराच्या चवीचं दूध म्हणजे निव्वळ अप्रतिम!!!! (शिवाय अधून मधून चमच्यात येणाऱ्या मनुका.. बदाम.. तळाचा अंजीर आणि मस्त मुरलेले खजूर आहेतच गट्टम करायला!!!)

वरचे साहित्य फक्त एका कपासाठी (एका व्यक्तीसाठी) आहे. दुधासकट सगळं मीक्सर मधून भुर्र.. केलं तर स्मुदी होईल. पण तसं नं करता असं चमच्या चमच्या ने प्यायला आणि खायला जास्त छान तर लागतंच शिवाय फार पसारा नं करता एकट्या दुकट्या राहणाऱ्या मुला-मुलीला करता येतं.

करायला लागणारा वेळ:- चार बदाम सोलायला अन् चार पाच खजुराच्या बिया काढायला असा कितीसा वेळ लागणार?

एकदा तरी करून आणि पिऊन बघाच. (म्हणजे रोजच करावसं/प्यावसं वाटेल!)
*****

विषय: 
पाककला
शब्दखुणा: 
मायबोली गणेशोत्सव २०२४
Groups audience: 
मायबोली गणेशोत्सव २०२४
Group content visibility: 
Public - accessible to all site users
शेअर करा

मस्त! रेसिपी, लिखाण, फोटो, पोषणमूल्य अगदी सगळेच..
त्यात मी फालुदाप्रेमी असल्याने मला हे आवडण्याची शक्यता आहे. पण सकाळी नाही. कारण मी बेड टी प्रेमी सुद्धा आहे. ते ब्रश करता करता आता चहा सोबत काय हादडायचे हाच विचार माझ्या डोक्यात चालू असतो Happy

बाकी हि स्पर्धेची एन्ट्री असल्याने त्यासाठी शुभेच्छा.. या गटात पहिलीच एन्ट्री तगडी आली आहे म्हणू शकतो Happy

Submitted by ऋन्मेऽऽष on 7 September, 2024 - 05:28

सलग तीन दिवस करत आहे.खुप आवडली. रेसिपी इतकी छान लिहिली आहे की करतानादेखील तुम्ही बोलताय असेच वाटत.

Submitted by देवरूप on 9 September, 2024 - 23:02

सलग तीन दिवस करत आहे.खुप आवडली. रेसिपी इतकी छान लिहिली आहे की करतानादेखील तुम्ही बोलताय असेच वाटत.>> रेसिपी लिहिण्याचं सार्थक झालं.

Submitted by SharmilaR on 9 September, 2024 - 23:35

नुसतं भिजवून दुधात मुरवून त्याची चव कितपत उतरेल ही शंका आहे मनात.>> गरम दुधात भिजवल्यामुळे छान उतरते चव दुधात.
(जशी आधी पाण्यात अंजीराची चव उतरली आहे.)

Submitted by SharmilaR on 10 September, 2024 - 09:05

मस्तच एकदम

मी खजूर पण या सगळ्यांबरोबर भिजवून करायची.

बाकी मी आणि आई पण तुमच्याच पंथातले- "एवढं.. आवडतं, की निव्वळ ‘आता ते प्यायला मिळणार’ हेच माझं पहाटे लवकर उठण्याचं motivation असायचं"

Submitted by धनवन्ती on 10 September, 2024 - 09:59

हे पेय, आणो त्याहीपेक्षा ज्या मस्त भाषेत ते लिहिलंय ते आवडलं.
एकच छोटी शंका.ड्रायफ्रुटस मध्ये कधीकधी ऍसिड चा किंवा नैसर्गिक आंबटपणाचा अंश असतो.
त्यामुळे धुताना अगदी खसखसून धुवावे लागतील.कारण गरम दूध आहे.

Submitted by mi_anu on 20 September, 2024 - 23:56

वाह, अमृतदुध,नाव पण भारी आणि कृती तर समोर बसून संगितल्यासारखी लिहिली आहे,नक्की करून पाहणार,अंजिरामध्ये गरम दूध घातल्याने दूध फाटणार नाही ना,प्रात्यक्षिक करूनच बघते.

Submitted by Anjali Chaubal on 21 September, 2024 - 00:01

@अंजली,
अंजिराच पाणी काढून टाकल्यामुळे असेल, पण दूध फाटत नाही.
केल्यापासून साधारण अर्ध्या/ एक तासात ते प्यायल्या जाणार आहे.
मी नेहमीच करते.

Submitted by SharmilaR on 21 September, 2024 - 00:42

दुध फाटत बिटत काही नाही. मुळात दुध आपण परत गरम करत नाही ना..

मी रोज करतेय हे.. मला बदाम भिजवुन खायचेच होते पण विसरायचे. आता आठवणीने करते. अंजीर खजुर वगैरे स्टोक संपत आलेला. गेल्या आठवड्यात मुंबै भेटीत सगळा परत भरला.

Submitted by साधना on 23 September, 2024 - 02:49

Pages