तू सोबत हवी होतीस

मरगटलेला वृक्ष होतो मी
तू चैत्राची पालवी होतीस
आज पुन्हा एकटाच मी
तू सोबत हवी होतीस..

पाणी नव्हते घोटभर जिथे
तू पावसाची धार होतीस,
दुःखाच्या पुरात बुडताना
तूच माझा आधार होतीस,
दुःखात जीवन कंठत होतो
तू सुखाची चावी होतीस,
आज पून्हा एकटाच मी
तू सोबत हवी होतीस..

वाट चूकलेला वाटसरू मी
तूच माझी दिशा होतीस,
वाट तापली उन्हानं तेव्हा;
तू थंडगार निशा होतीस,
जूनाटलेल्या मनास माझ्या
तू झळाळी नवी होतीस,
आज पुन्हा एकटाच मी
तू सोबत हवी होतीस...

अंधारलेलं जीवन माझं
तू आशेचा दिवा होतीस,
बेसूर बेताल जीवनात माझ्या
तू सुमधूर पावा होतीस,
दुःखाची रात्र होती आयुष्यात
तू सुखाचा रवी होतीस,
आज पुन्हा एकटाच मी
तू सोबत हवी होतीस..