विकास

Submitted by पॅडी on 6 March, 2024 - 23:19

गाव- पांदीत पायाचा , आता उमटेना ठसा
सांदीकोपऱ्यात उभा , गाव रडे ढसाढसा ...

ओढ आटली; जिव्हाळा, नात्यातला हरपला
अंगणातला पिंपळ, उभ्या उभ्या करपला...

रस्ते डांबरट झाले, वीज उजळते गाव
मिणमिण कंदिलास, कवडीचे मोल भाव...

लेकबाळ माहेराला, सणासुदीला पारखी
मायमाऊली सचिंत, लागे उचकी सारखी...

चिल्या-पिल्यांचा गलका, नाही पदराशी झोंबी
चिंचा आवळे सुकले, गेली करपून ओंबी...

गुरावासरांचा गोठा; नाही हंबरत गाय
डेअरीच्या दुधावर, मेली येईनाच साय...

घंटा-घुंगरांचा नाद, गेल्या बंड्या बैलगाड्या
दारापुढे झाकलेल्या, उभ्या चारचाकी गाड्या...

हरपल्या गप्पा-टप्पा, वड -पारंब्याचे झोके
विकासाच्या आरशात, दिसे गाव ओकेबोके..!

विषय: 
साहित्य
Groups audience: 
गुलमोहर - कविता
Group content visibility: 
Use group defaults
शेअर करा

नाण्याची दुसरी बाजू?
कविता जरा निराशावादी वाटली. गावांचा विकास व्हायलाच हवा पण निसर्गाचेही जतन व्हावे.

Submitted by सामो on 7 March, 2024 - 06:45

गावचा विकास होत असताना कमी होत चाललेली मातीमधील ऊब ह्याची खंत शब्दबद्ध करण्याचा अल्पसा प्रयत्न.
प्रतिक्रियेबद्दल आभार.

Submitted by पॅडी on 8 March, 2024 - 02:21