लेखन उपक्रम २ - लाल कांजीवरम - कविन

बाकीचे अजून आले नव्हते. गाडी यायला तसा वेळच होता. तेवढ्यात त्याचे लक्ष तिच्याकडे गेले.

लाल रंगाची कांजीवरम त्यावर टेंपल जुलरीचा साज ल्यालेल्या तिच्यावरुन त्याची नजरच हटत नव्हती. लाल कांजीवरमने मनाचा ठाव घेतला होता.

"रमणीचा गृहप्रवेश लाल कांजीवरम नेसूनच व्हायला हवा. त्यासोबत हातभर लाल हिरव्या काचेच्या बांगड्याही हव्या."

त्याने एकवार डोळे मिटून घेतले.
रमणीचे रुप त्याच्या मिटल्या डोळ्यापुढे तरळले एखाद्या जुन्या स्वप्नासारखे.

यावेळी मात्र डोळे उघडल्यावर स्वप्न हरवण्याची भीती त्याला वाटत नव्हती. त्याने हातातल्या फाईलकडे बघितले. यावेळी स्वप्न नक्की पूर्ण होणार होते.

सेक्स चेन्ज' ऑपरेशनची तारीख आता ठरली होती.
'रमण ते रमणी' प्रवासाची पुर्तता, लाल कांजीवरम नेसून केलेल्या गृहप्रवेशानेच होणार होती.