झुंड... नाही टीम!

काही काही मनाला भिडलेले प्रसंग -
अंकुश वाघमारेला मारायचं ठरवून कटर विकत घेतो आणि पोलीस स्टेशनबाहेर जाऊन बसतो. त्याचे मित्र त्याला समजावत असतात तेव्हा आपल्यालापण मनापासून वाटतं की त्याने खून करू नये, परत त्या गर्तेत पडू नये. आपणही मनात म्हणतो की अरे, नको करू खून. मुळशी पॅटर्नमधला तो रेस्टॉरंटचा प्रसंगपण असाच होता.

नंतर सिक्युरिटी चेकला कटरमुळे त्याला अडवतात, तो कटर फेकून देतो, तो प्रसंग तर भारीच आहे, पण मग तो ऑफिसर त्याला परत जायला सांगतो तेव्हा बहुतेक त्याला वाटतं की आपल्याला आता परत पाठवतायत..कटर सापडला म्हणून. पण मग जेव्हा त्याला कळतं की तसं नाही, फक्त मागे जाऊन परत यायचंय, तेव्हा त्याच्या चेहऱ्यावर परत आनंद दिसतो. तेव्हाही वाईट वाटलं, की त्यांना असे नकार, बंद झालेली दारं बघण्याची सवयच झालेली असते.

रिंकू राजगुरूला पासपोर्ट मिळवण्यासाठी करावी लागलेली धडपड.

भारत मतलब? हा प्रश्न.

शेवटी विमान उडतं तेव्हा Crossing this wall is strictly prohibited. Trespassers will be prosecuted ही ओळ फारच मनात घुसते.

खटकलेल्या गोष्टी- अमिताभ बच्चन नुकताच निवृत्त झालेला, म्हणजे साठीचा वाटत नाही. त्याचा मुलगा अमेरिकेत जाऊन परत का येतो ते कळत नाही. मुलांचे पासपोर्ट झाले पण व्हिसाबद्दल काहीच दाखवलं नाही, विशेषतः अंकुशला तर ऐनवेळेस पासपोर्ट मिळतो. अशा काही गोष्टी.

अभिनय सगळ्यांनी मस्तच केले आहेत. अभिनय करतायत असं वाटतच नाही.

हो, दोनपाच चुका माफच
त्या आत्महत्या करायला गेलेल्या मुलाचंही बघून असं वाटलं की आत्महत्या करावीशी वाटणाऱ्याने जरा विचार करावा की आपण आत्ता जगलो तर किती काय काय चांगलं होऊ शकतं. भाबडा संदेश असेल, पण हरकत नाही. कुणीही आत्महत्या केल्याची बातमी वाचली की खूप वाईट वाटतं.

अजून एक.. किशोर कदमला 'फँड्री'तल्यासारख्या अजून एखाद्या जबरदस्त भूमिकेत बघायला आवडेल. इथे त्याला त्याच्या क्षमतेच्या मानाने फारसं काही काम नाही. ('न्यूड' मध्ये चक्क त्याला वायाच घालवल्यासारखं काम होतं त्यापेक्षा चांगलं आहे अर्थात)

पॅरेंटल गाईडन्स सांगा... न्यूडिटी सेक्स रक्तपात वगैरे आहे का?

च्रप्स, नाही. फारसा रक्तपात वगैरे नाही. आम्ही मुलांना घेऊनच गेलो होतो.

न्यूडिटी, सेक्स अजिबात नाही.व्हायलन्स आहे थोडाफार पण ग्राफिक रक्तपात दृष्ये मला तरी आठवत नाहीत. यंग एज ची मुले नशा/स्मोक करताना दिसतात मात्र.

अमिताभ खटकण्यावर -

"सूर्यवंशम मधला "तरूण" अमिताभ चालणार्‍यांना यातला अमिताभ खटकतो हे आश्चर्यच आहे!"

असे काहीतरी प्रक्षोभक विचारावे मधेच. मग प्रत्यक्षात तो अमिताभ सर्वांनाच खटकला. बहुधा अमिताभला स्वतःलाही. आणि त्यातील म्हातार्‍या अमिताभपेक्षाही तो म्हातारा दिसला. तरी हरकत नाही. आपण भारी पिंक टाकणे महत्त्वाचे. प्रत्यक्षात लोकांचे मत तसे असो वा नसो. ते तसे आहेच असा आभास निर्माण झाला म्हणजे झाले हा पॅटर्न इतरत्रही दिसेल.

धन्यवाद... आज्जी ला घेऊन जायचा प्लॅन आहे म्हणून पॅरेंटल गायडन्स विचारला...

च्रप्स
यावरून लहानपणची एक गंमत आठवली!
एकदा लहानपणी मी आणि माझी बहीण टीव्हीवर कुठला तरी पिक्चर बघत होतो. आईबाबा आणि आजी झोपले होते. मधेच आजी उठली बाथरूमला जाऊन यायला. नेमका तेवढ्यात थोड्या वेळाने कदाचित एक 'आक्षेपार्ह' सीन सुरू होणार आहे याचा आम्हाला अंदाज आला. आता अचानक टीव्ही बंद केला तरी आजी विचारणारच, की का बंद केला आणि नेमका तो सीन तिने बघितला, तरी म्हणणार असले कसले सिनेमे बघता वगैरे ती जाऊन आली आणि बसली की आमच्या बरोबर दोन मिनिटं बघायला.. मग आम्ही तिला तू नको बघू, तुला नाही आवडणार वगैरे इतकं आग्रहाने सांगून सांगून झोपायला पाठवलं, की शेवटी दुसऱ्या दिवशी तिने बाबांना हे सांगितलंच.

वा च्रप्स, आज्जी अमेरीकेत आली आहे हे वाचूनच मज्जा आली.. इथे यायची पहिलीच वेळ असेल तर त्यांचा अनुभव लिहा

बराच उशीर करून हा होईना पण पाहिला (झी५). पिक्चर चांगला आहे, सर्वांची कामे मस्त आहेत. पण एकूण चित्रपट माहितीपटाच्या लेव्हलच्या वर उचलला जातच नाही. त्यामुळे खूप सपक वाटतो. दिग्दर्शन, कॅमेरावर्क वगैरे चांगले आहे पण काहीतरी कमतरता जाणवते.

पटकथा व संवाद मात्र अगदीच साधेसुधे व अनेकदा बाळबोध आहेत. "असा सीन आपण पूर्वी पाहिलेला आहे, पण इथे मंजुळेच्या दिग्दर्शनाची कमाल दिसेल" असे सतत वाटत राहते पण प्रत्यक्षात तसे काही होत नाही. अमिताभचा कोर्टातील मोनोलॉगही काही फार खास लिहीलेला नाही. अमिताभ हा "बच्चन" वाटत नाही त्या लॉजिकने त्याचे काम चांगले आहे. पण त्याला आव्हानात्मक फारसे काही नाही इथे.

इतर पात्र कोण आहेत हे डॉक्युमेंटरी स्टाईल थोडंफार समजतं, पण मंजुळे स्टाईल दृकश्राव्य असतं तर मजा आली असती वाटत रहातं. >>> हे मूळ लेखातील वाक्य चपखल आहे. मला तर इव्हन त्या डॉन चे पात्र इतके अपील झाले नाही.

हिंदीत असे रांगड्या प्रवाहा बाहेरच्या नागड्या व्यक्तिरेखांना घेऊन, त्यांच्यावर मेहेनत करुन, त्यांच्याकडून काम काढून घेऊन चित्रपट फारसे नसतात. त्यामुळे एकुणात चित्रपट आवडला. पण नागराज मंजुळेचा म्हटल्यावर कदाचित फारच जास्त अपेक्षा ठेवून गेलो असेन, त्यामुळे थोडी निराशा झालीच. >>> यालाही +१

बाकी प्रतिके वगैरे ठीक. सैराट मधे पडद्यावरचा सीन आधी नुसताही भन्नाट वाटतो. मग लक्षात येते की यातही काही दडलेले आहे. इथे तसे नाही. इतर मराठी पिक्चरप्रमाणे "हे घ्या प्रतीक" म्हणून ते समोर येते. शेवटी विमान उडताना ते कुंपण पार करून जाते हे लोकांना कळू दे. तेथे ती एक कृत्रिम पाटी कशाला? अश्या कोण पाट्या रेसिडेन्शियल एरियाच्या कुंपणांवर लिहीतात? आणि ते ही इंग्रजीत. विशेषतः तेथेच बाजूला गेट असताना?

तेथे आर्ची, परश्या व इतर मित्रमंडळी २०-२५ मिनीटांत आपल्या पूर्ण ओळखीची होतात. इथे जवळजवळ सगळे फेसलेसच राहतात. कदाचित तोच हेतू असेल. पण त्यामुळे आपण कोणाच्याच कथेत फारसे गुंतत नाही.

एकदा बघायला चांगला आहे. पुन्हा बघायला पेशन्स राहील का माहीत नाही.

मुलांचे पासपोर्ट झाले पण व्हिसाबद्दल काहीच दाखवलं नाही, >> २०१४ नंतर सर्व देशांचा व्हिसा औन अरायवल आहे , आधी काढावा लागत नाहि