साथ कविते तुझी....

कधी लाभते सौख्य बोलून सारे
कधी लाभते फक्त मौनातुनी
अधर जाणिवेचे जरी मूक झाले
तरी व्यक्त होईल काव्यातुनी

जसा रंध्र लांघून हा स्वेद झरतो
तसे शब्द झरतात प्राणातुनी
व्यथा, वेदना वा सुखांचे उमाळे
तसे जन्मते काव्य ह्रदयातुनी

बरे, चांगले, त्याज्य सारेच येते
कधी ना कधी या उभ्या जीवनी
मला दाविते साथ कविते तुझी ही
नवी वाट या आडवाटांतुनी

---- ©मयुरेश परांजपे----
      २१/०३/२०२१

जागतिक कविता दिनाच्या हार्दिक शुभेच्छा