अनंगा

अनंगा
*****

नाचविले मज
बहु तू अनंगा
आता रंगू दे रे
अवधूत रंगा ॥

जाहलो किती रे
सेवुनिया धुंद
जाई-जुई गंध
निशिगंध मंद ॥

डोळ्यात कुणाच्या
हरवून खोल
शब्दात कुणाच्या
विसरून बोल ॥

स्पर्श रेशमी त्या
जाहलो बेभान
जाणले पाहिले
यौवनाचे गाण ॥

हाय परी त्यात
आकंठ अतृप्ती
जाळणारी आग
पडती आहुती

विझू देत आता
आवेग तनुचे
पडू देत आता
स्वप्न त्या प्रभुचे ॥

सोड सोड आता
मनाचे या ठाण
कणोकणी आता
येवो शिव गाण ॥

दग्ध तुला पुन्हा
कोण जाळू शके
अग्नि पोटी तुला
कोण पाहू शके ॥

तूच आता देवा
कृपा करी थोर
माझ्यासाठी होई
नाथ जालंधर ॥

धरुनिया हाता
करी कानिफा वा
गोपीचंदा सम
मार्ग एक दावा ॥

विक्रांत दारात
तुला आन मागे
रंग भगवा दे
आस मनी लागे ॥

***********
© डॉ.विक्रांत प्रभाकर तिकोणे
https://kavitesathikavita.blogspot.com