पाककृती स्पर्धा १ - उपवास मोदक/ उपवास शाही मोदक - साक्षी

साहित्य :

सारणासाठी -
आळीव/ हाळीव - ५० ग्रॅम
ओलं खोवलेलं खोबरं - २ वाट्या
गुळ - १.५ वाटी
वेलची पावडर

उपवास मोदक पारीसाठी -
वरई पीठ - १ वाटी
पाणी - १ वाटी
लोणी/ तेल - १ चमचा
चवीपुरते मीठ

उपवास शाही मोदक पारीसाठी -
काजू - १ वाटी
साखर - अर्धी वाटी
पाणी - पाव वाटी

कृती :
सारण -
१) आळीव २ तास दुधात किंवा नारळाच्या पाण्यात भिजत घालावे. किंवा नारळाच्या चव घेऊन त्यात मिसळून ठेवले तरी चालतील.
२) आळीव भिजले की गुळ मिसळून गॅस वर शिजवायला ठेवा. अंदाजे ८-१० मिनिटांत व्यवस्थित शिजेल. सारण आधी पातळ असेल नंतर घट्ट होत जाईल.
३) सारण शिजलं की गॅस बंद करून वेलची पावडर मिसळा.
४) हे सारण दोन्ही प्रकारच्या मोदकांसाठी कॉमन असणारे.

तयारी

उपवास मोदक
१) जाड बुडाच्या पातेल्यात पाणी घ्या. त्यात लोणी/ तेल आणि चवीपुरतं मीठ घाला. पाणी चांगले रटरट उकळले की वरईचे पीठ घाला आणि भराभर हलवा. सगळं नीट मिक्स होऊ द्या. झाकण ठेऊन एक दणदणीत वाफ येऊ द्या आणि आच बंद करा.

२) उकड गरम असतानाच चांगली मळून घ्या. छोटा गोळा घेऊन तो परत छान मळून घ्या. हाताला किंचित तेल लावून वाटी चा आकार द्या. पातळ पारी झाली की एक चमचा सारण भरा. बोटांनी पारीच्या कडेवर निऱ्या घाला आणि मोदक वळून पूर्ण करा. असे सगळे मोदक वळून घेऊन नेहेमीच्या मोदकांसारखे १५ मिनिटे वाफवून घ्या.

उपवास शाही मोदक
१) मिक्सरमधून काजूची पूड करुन घ्या.
२) जाड पातेल्यात साखर आणि पाणी एकत्र करून गॅसवर ठेवा. पाणी उकळलं की लगेच काजू पावडर घालून सतत ढवळा. मिश्रण थोडं घट्ट झालं की लगेच गॅस बंस करा.
३) जरा गार झालं की ह्याचा गोळा मळून घ्या.
४) एक छोटा गोळा घेऊन त्याला वाटीचा आकार द्या. उकडिच्या मोदकाइतकी पातळ पारी नको. जाड ठेवा.
५) ह्यात एक चमचा सारण भरून वाटी बंद करून मोदकाचा आकार द्या. मग चमच्याच्या मागच्या बाजूने हळुवार हाताने निर्‍या काढा. याच पद्धतीने सगळे मोदक वळून घ्या. तुमच्याकडे मोदकाचा साचा असेल तर हे मोदक साच्यात करायला जास्त सोपे जातील. माझ्याकडे साचा नाहिये आणि स्पर्धेला साचा नको असा नियम होता म्हणून मी असे केले.

शाही मोदक कसे करायचे ते इथे बघून कळेल

तयार शाही मोदक

अजुन एक

हे उकडीचे आणि काजूचे सगळे एकत्र