पाककृती स्पर्धा १-लो कार्ब प्रोटीन रिच बेक मोदक-mi_anu

बसल्या जागी करता येईल, कमीत कमी उंटावरून शेळ्या हाकून आणि जास्तीतजास्त स्वतःचं योगदान देऊन अशी रेसिपी हवी होती.
आधीची आयडिया आख्खा मसूर ज्वारी मोदक होती पण स्वयंपाकघरात चालत न जाता ते शक्य नव्हतं.
नमनाला जास्त तेल न घालता ही रेसिपी:

तूप 100 ग्रॅम
बेसन दिड मोठा कप
मीठ 1 छोटा चमचा
बेकिंग पावडर अर्धा छोटा चमचा
ओवा
जिरे

तूप चमच्याने थोडं फेसलं.
मग त्यात बेसन, मीठ, जिरे ,बेकिंग पावडर घालून हलक्या हाताने बेसनाला तूप चोळलं.

नंतर त्यात 4 चमचे दूध घालून अगदी हलक्या हाताने मळलं आणि मोदकाकार दिला.
लोकांना हाका मारून मायक्रोव्हेव प्रि हिट करायच्या कामाला लावलं.
तोवर 4 मोदक आणि उरलेल्या मिश्रणाची कुकीज केली आणि मायक्रोव्हेव तव्यात(तव्याला) तूप लावून ठेवली.

लोकांना अजून थोड्या हाका मारून मायक्रोव्हेव ची तिवई स्वयंपाकघराच्या सर्वात उंच कपाटातून काढवली आणि बिस्किटे+मोदक 180 डिग्री वर 12 मिनिटे बेक करायला ठेवली.

घरात सँडविच ची पुदिना चटणी तयार होती.ती आणि सॉस वाढून फोटो काढला आणि आम्ही सगळ्यानी गरम मोदक आणि कुकीज गट्टम केले.पुदिना चटणी बरोबर मस्त लागले.

अधिक टीपा: जे लोक मायक्रोवेव्ह लावणार असतील त्यांना किंवा स्वतःला 'मायक्रोवेव्ह बंद केल्यावरही अंग च्या उष्णतेने पदार्थ बेक होत राहतो' ही कल्पना अतिशय मायाळूपणे आधीच समजावून सांगा.
चहाबरोबर पण मस्त लागतात.आता ही पोस्ट लगेच पूर्ण करून बसल्या बसल्या केटल मध्ये चहा करणार आहे.