उपकरणं शरणं गच्छामि -गोडाच्या शेवया - साक्षी

लागणारा वेळ : ४० ते ४५ मिनिटे
वापरलेली उपकरणे :
अ) यादी १ मधील ढोकळा स्टॅन्ड किंवा इडली स्टँड
आ) यादी २ मधील सोर्‍या

साहित्य :
उकडीसाठी :
१) तांदूळ पिठी - १ भांडं भरून (मी अग्रजची वापरली)
२) पिठीइतकेच पाणी
३) साजूक तूप - १ ते १.५ चमचा
४) मीठ - चिमूटभर
रसासाठी :
५) नारळाचं दाट दूध - १ मोठ्ठं भांडं भरून
६) गूळ - १.५ वाटी (गोडाच्या आवडीप्रमाणे कमी जास्त करावा. पण रस थोडा गोडंच करावा. म्हणजे शेवया घातल्यावर योग्य गोड होते.

वाढणी : एका व्यक्तीस भरपूर

कृती :
१) नारळाच्या दूधात गूळ मिसळून ठेवा.
२) एका जाड बुडाच्या पातेल्यात पाणी तापत ठेवावे. त्यात साजूक तूप व चवीपुरते मीठ घालावे. पाणी खळखळ उकळले की त्यात पिठी घालून उलथण्याच्या टोकाने चांगले ढवळावे आणि झाकण ठेवावे. १ ते २ मिनिटांनी गॅस बंद करावा.

ही उकड गरम असतानाच गार पाण्याचा हात लावून चांगली मळून घ्यावी व त्याचे उंडे करून घ्यावे.
३) हे उंडे इडली पात्राला तेलाचा हात लावून त्यात ठेवावे व १५ मिनिटे उकडून घ्यावे.

४) सोर्‍याला शेवेची चकती लावून उकडलेले उंडे भरा.
५) ज्या वाटीतून खायला देणार (सर्व्ह करणार) त्यात शेव पाडा. त्यावर नारळाचा गोड रस शेवया बुडतील इतका घाला.

गोडाच्या शेवया तयार !

कोकणातल्या लोकांना हा पदार्थ नक्कीच माहित असेल. किती दिवस इथे द्यायचा होता. रविवारी संध्याकाळी डोकं काम करु लागलं आणि लक्षात आलं की हा पदार्थ नियमांत बसतोय. आज शेवटच्या दिवशी मुहुर्त मिळाला इथे देण्यासाठी!

चुकून फोटो मधे तेल घेतलंय. दुर्लक्ष करा.☺