सुलतान प्लस मायनस सलमान

खून मे तेरे मिट्टी
मिट्टी मे तेरा खून
उपर अल्लाह निचे धरती
बिच मे तेरा जुनून..
रे सुलतान.. एक नंबर सुलतान .. एक नंबर

अपेक्षाफाड निघाला पिक्चर
सलमानचा पिक्चर नाहीयेच हा.. सलमानपट म्हणजे सौथेंडियन, उथळ, वरवर, मेलोड्रामा, स्टाईलगिरी, आयटम नंबर, भाई आले, भाई नाचले, भाईंनी फाईट केली, भाई भाई करत ३०० करोडचा चुना लावून गेले. पण जर बाहुबलीसारखा एखादा पिक्चर ईथे करोडो कमावत असेल आणि वर राष्ट्रीय पुरस्कारही मिळवत असेल तर सुलतानचा हक्क आहे चार ५०० करोड कमवायचा. या देशात आजवर फायटींगवर एवढा आकर्षक चित्रपट बनला नसावा. त्या नाच बलियेमध्ये महागुरू जसे नृत्यातले बारकावे टिपून सांगायचे तसे फायटींगमधील बारकावे टिपत ते पब्लिकला ईंटरेस्टींग वाटावे अश्या पद्धतीने सादर केले आहेत. एकूण एक फाईट सीन ईंटरेस्टींग आहेत.

सलमान खान - सलमानने हि भुमिका पेललीय. एखाद्या भुमिकेसाठी तो मेहनत घेईल अशी अपेक्षाही केली नव्हती. पण त्याने अपेक्षेच्या फार पलीकडे जात आश्चर्याचा धक्का दिलाय. सुरुवातीला तो जरासा मेंगळटासारखा वागताना म्हातारपणीचा धर्मेंद बघतोय असे वाटत होते. पण लगेच त्याने स्वताला सावरले आणि हळूहळू सलमान स्पेशल एक्स फॅक्टर हा त्या कॅरेक्टरशी छेडछाड न करता दिसू लागला.
एक मात्र नक्की, हा सलमानच्या कारकिर्दीतला लक्षात राहणारा रोल ठरेल. सचिनने जसे वयाची पस्तिशी उलटल्यावर आता हा निवृत्त होईल काही वर्षात या चर्चा झडू लागण्याच्या वयात पोहोचल्यावर एकदिवसीयमध्ये २०० धावा मारल्या होत्या, तसेच काहीसे सलमानने त्याच्या लेव्हलला केले आहे.

अनुष्का शर्मा - पुन्हा एकदा ईम्प्रेस केले. ती सुद्धा चित्रपटात सलमानसारखीच पहिलवान दाखवली आहे. पण भुमिकेची गरज म्हणून बॉडी शॉडी कमवायच्या नादात आपल्या सौण्दर्याशी खेळ न करता अभिनय आणि बॉडी लॅगवेजच्या जिवावर तिने आपले कॅरेक्टर विश्वसनीय केले आहे.

आर आश्विन - मला याचे नाव माहीत नाही पण हा थोडाफार भारतीय क्रिकेटपटू आश्विनसारखा वाटतो. हा तोच जो सुलतानच्या सेकंड इनिंगमध्ये त्याला आपल्यातर्फे रिंगणात उतरवतो. याचे कॅरेक्टर फार छान जमलेय आणि अभिनय फार संयत झाला आहे.

ईतर कॅरेक्टर - सुलतानचा मित्र, सासरा (उस्ताद), कोच वगैरे आपापल्या जागी परफेक्ट. अन्यथा ओवरएक्टींग माझ्या फार डोक्यात जाते.

संगीत - एकदोन गाणी मूड बनवतात, पण एक दोन फिल्मी प्रेमगीते पुढे ढकलायला हातात रिमोट असता तर बरे अशी वाटतात. पण पिक्चर मोठा असल्याने बाथरूमला जायची सोय म्हणून त्याकडे बघू शकतो. अन्यथा ईतर चित्रपट बोर व्हायची संधी देत नाही ईतक्या वेगात सरकतो.
लेखाच्या सुरुवातीचे टायटल साँग मात्र चित्रपटाचा आत्मा आहे. जसजसे आपण चित्रपटात गुंतू लागतो तसे हे गाणे आल्यावर आपल्याही अंगात वीरश्री संचारू लागते. जे योगदान सैराटच्या यशात त्याच्या गाण्यांचे आणि बॅकग्राऊण्ड म्युजिकचे आहे तेच ईथे सुलतानच्या यशात या गाण्याचे असेल.

एक्शन - मजा आणते. या चित्रपटाचा खरा हिरो यातील एक्शन आहे. त्या रोहीत शेट्टीला कोणीतरी सांगा की गाड्या उडवण्यापेक्षा अशी माणसे उडवून दाखव. जास्त मजा येते. सुलतान स्पेशल धोबीपछाड तर ईतका कमाल जमलाय की त्या जिवावर सुलतान कोणालाही पछाडू शकतो हा विश्वास आपल्याला वाटू लागतो. रेसलिंग कॉम्पिटीशनच्या पहिल्याच राऊण्डला तो जगाला याची झलक दाखवत जेव्हा जिंकतो, त्यानंतरचा माहौल जसा पडद्यावर बनतो तसाच तो चित्रपटगृहातही अनुभवला. लोकं टाळ्या आणि शिट्ट्या वाजवतात, ज्यात एखादा माझ्यासारखा शाहरूखचा फ्यानही असतो.

ओवरऑल - सुलतानमधून सलमानला प्लस करा किंवा मायनस करा, सुलतान हा सुलतान आहे आणि त्यासाठी म्हणून चित्रपट एकदा तरी बघायलाच हवा.
दुसऱ्यांदा बघायचा की नाही हे ज्याची त्याची आवड.
पण जर २०० रुपयांपर्यंत तिकिट मिळत असेल तर या सुलतानला थिएटरातच अनुभवा. पैसा वसूल आहे. हेच सांगायला एवढ्या रात्री हा लिखाणप्रपंच. उद्या फ्रेश मूड मध्ये आणखी भर टाकेन