केल फॅन क्लब

केल ही एक बहुगुणी भाजी फार उशिरा नजरेस पडली. हिरव्या भाज्यांमधे हिचा पहिला नंबर लागतो. वेब एमडी मधे हिचा न्युट्रीशन पावरहाउस म्हणुन उल्लेख केला आहे. माझ्या दृष्टीने ह्यातच सगळे आले. पण एकदा तिचा आहारात समावेश झाल्यावर जवळ जवळ दिवसा आड एकाच रेसीपीमुळे कंटाळा आला. (करण्याचा. खायचा नाही ). मी काही रेसीपीज गोळा केल्या आहेत तुम्हीही ह्यात भर घाला..

केल ची भाजी :१:
लागणारे जिन्नसः
१. बेबी केल
२. १ कांदा बारीक चिरुन
३. ५/६ लसणाच्या पाकळ्या बारीक चिरुन
४. ३/४ हिरव्या मिरच्या
५. तेल (ऑ ऑ)
६. मिठ
कृती: तेलावर (ऑ ऑ, थोड जास्त असत, भाजी हेल्दी आहे अस म्हणुन मी स्वत:ला माफ करते स्मित ), बारीक कापलेला कांदा, लसुन, हिरवी मिरची परतवुन कांदा शिजला की त्यात बेबी केल टाकुन हलवुन सारखी करुन झाकण ठेउन शिजवुन घ्यायची. शेवटी चवीपुरते मिठ टाकुन सारखी करुन गॅस बंद करायचा. मेथी करतांना मिठ टाकल्यावर झाकण ठेवल तर भाजीचा रंग बदलतो अस सांगितल गेल असल्यामुळे ह्या भाजीतही मी झाकण ठेवत नाही. फुलक्यांबरोबर एक नंबर लागते.
केल कोवळीच घ्या नाही भाजी शिजायला वेळ लागतो आणि खातांना कचकच लागते.

केलच्या भाजीचे अजुन एक वेरीयेशनः२:
हिरव्या मिरच्यांच्या एवजी लाल मिरचीची पुड (क्रश्ड रेड पेपर). ह्यात मी कांदा टाकत नाही बाकी कृती वरील प्रमाणेच.

केल ची भाजी मोड आलेल्या मसुर मधे :३:
१. बेबी केल साधारण ३ वाट्या
२. मोड आलेले मसुर
३. १ कांदा बारीक चिरुन
४. १ चमचा अद्रक लसुन पेस्ट
५. १ मध्यम आकाराचा टोमॅटो बारीक कापुन
६. १ चमचा तिखट
७. तेल (ऑ ऑ)
८. मिठ
कृती:
तेलावर अद्रक लसुन पेस्ट ब्राउन झाल्यावर त्यात कांदा परतवुन शिजला की टोमॅटो घालुन एक जीव करुन घ्या. २/३ मिनीटांनी तिखट टाकुन हलवुन २ मिनीट ठेवा. मग त्यात मसुर, केल टाकुन परत एकदा हलवुन घ्या. झाकण ठेवा. मी ह्यात पाणी टाकत नाही त्यामुळे लागल तर झालणावर पाणी ठेवते. मसुर शिजली की मिठ टाकुन एक जीव करुन २ मिनीटात गॅस बन्द करा.

ह्यात हिरवी मिरची वापरली आहे.

केल चिप्सः
लागणारे जिन्नसः
१. बेबी केल
२. ऑलीव्ह ऑइल
३. मिठ, मिरे चवी पुरते
कृती:
केल ओली असेल तर पेपर टॉवेलने कोरडी करुन एका भांड्यात मिठ मिरे पावडर आणि ऑ ऑ टाकुन चोळुन घ्या. एकीकडे ओव्हन ३५० फॅ ला सुरु करा. ऑव्हन तापले की एका ओव्हन ट्रे मधे केलची पानं एका लेअर मधे पसरवुन ओवन मधे १५/२० मिनीटे क्रिस्पी होउ द्या.
मिड डे स्नॅक्स साठी छान आहे.

केल सॅलेड:
लागणारे जिन्नसः
१. बेबी केल १ कप
२. कोवळी पालक १/४ कप
३. फेटा चीज १/४ कप
४. ड्राईड क्रॅनबेरी/रेसीन किंवा तत्सम काहीही
५. अक्रोड १/४ कप
६. ऑलीव्ह ऑइल बेस्ड ड्रेसिंग
अ. ऑ ऑ +मिरे पावडर्+ लिंबू+चवीला किंचीत मिठ
ब. ऑऑ, लिंबु, मध, कोथींबिर, नखभर मिठ (१/२ वाटी तेलाला ५/६ पानं) मिक्सर मधे एकजीव होईपर्यंत फिरवुन घेते
कृती: वरील सगळे जिन्नस वाढण्याआधी पाच मिनीट आधी एकत्र करुन वाढावे. सोबत ग्रील्ड फिश/ चिकन , वेजी असाल तर सॅलेड मधेच १/२ कप बिन्स मिक्स करायला हरकत नाही.

ग्रीन स्मुदी - विथ केलः
१ कप पालक
१/२ कप केल
१ छोटी काकडी
१/२ अव्हाकाडो
सेलेरी चे १, २ तुकडे
१ कप ज्युस (मी पेरुचा वापरला)

ब्लेन्डर मधे मिक्स करा. मस्त स्मुदी तयार होते. एन्जॉय