आयुष्य

Submitted by अमेय२८०८०७ on 11 July, 2013 - 12:04

तू भेटशी नव्याने सामर्थ्य जोखताना
अंधार भेदणारे चैतन्य शोधताना

पाण्यात सावल्यांचे आकाश भोवताली
हातात थेंब आले आभास वेचताना

दगडात देव आहे माझे मला न कळले
पाषाण जीवनाचा खोदून कोरताना

ही कोणत्या सुखाची लाली पहाट देते
रात्रीस वेदनांनी भाजून काढताना

आव्हान मत्त द्यावे दृष्टीस सागराच्या
लाटेस एकट्याने बाहूंत वेढताना

माझा तुझा म्हणावा की दोष चांदण्यांचा
ओठांत ओठ आले गाण्यात बोलताना

विषय: 
काव्यलेखन
शब्दखुणा: 
गझल
Groups audience: 
गुलमोहर - गझल
Group content visibility: 
Public - accessible to all site users
शेअर करा

अहाहा अगदी !
माझा तुझा म्हणावा की दोष चांदण्यांचा
ओठांत ओठ आले गाण्यात बोलताना..

Submitted by भारती.. on 12 July, 2013 - 03:31