उद्ध्वस्त होण्या वादळे नेतात का कोणी घरी

धाडू नको आमंत्रणे, बेभानता नाही खरी !
उद्ध्वस्त होण्या वादळे नेतात का कोणी घरी

माझ्या-तुझ्या नात्यातले पावित्र्य सांभाळू असे
तू देव गाभा-यातला मी देवळाची पायरी !

तारूण्य, चुंबन वा मिठी... यातील काहीही नको
नुसत्या खयालांनी तुझ्या आरक्त व्हावी शायरी

घालू नको घेवू नको, शपथा निरर्थक वाटती
आजन्म देण्या साथ तू घे जन्म एखादातरी

जे व्हायचे असते जसे होवून जाते ते तसे
तेव्हा तसे का वागलो सांगू नको आत्तातरी

नाणे नकाराचे तुझ्या सर्रास तू खपवू नको
नाण्यास असती दोन बाजू एक झाकावी तरी !

-सुप्रिया.