भगवंता

Submitted by वैभव फाटक on 3 December, 2012 - 13:44

शरण आलो तुला, पण संपला ना त्रास भगवंता
तुझ्या असण्यावरी ठेवू कसा विश्वास भगवंता ?

प्रपंचातून जर आहे दिला मी वेळ भक्तीला
कशाला सांग मी घेऊ उगा संन्यास भगवंता ?

नको छेडूस प्रश्नाला "पुरे की आणखी देऊ ?"
मनुष्याने कधी म्हटलेच नाही 'बास' भगवंता

कधी कळणार लोकांना, कसे जिंकायचे तुजला ?
मनी अंधार वसला अन घरी आरास भगवंता

जगाची सर्व दु:खे दूर करणे शक्य का नाही ?
कदाचित तोकडे पडले तुझे सायास भगवंता

वैभव फाटक ( ३ डिसेंबर २०१२)

http://vaibhavphatak12.blogspot.in/2012/12/blog-post.html

विषय: 
काव्यलेखन
शब्दखुणा: 
वैभव फाटक; मराठी गझल
Groups audience: 
गुलमोहर - गझल
Group content visibility: 
Public - accessible to all site users
शेअर करा

>>>मनी अंधार वसला अन घरी आरास भगवंता<<<

निवडक दहातील ओळ!

एकंदर संपूर्ण गझल फार सुरेख आहे.

सर्व शेर उत्तम! अभिनंदन वैभव!

धन्यवाद!

-'बेफिकीर'!

Submitted by बेफ़िकीर on 3 December, 2012 - 13:51

जगाची सर्व दु:खे दूर करणे शक्य का नाही ?
कदाचित तोकडे पडले तुझे सायास भगवंता >>>>

भक्तिमय रचना.... इन माय टेन Happy

Submitted by -शाम on 3 December, 2012 - 22:13

अशक्य सुंदर.

सुरेख, छान, अप्रतिम....सर्व विशेषणे फिकी पडतील अशी जबरी रचना.

अगदी म्हणजे अगदीच जमलेली रचना.

Submitted by पुरंदरे शशांक on 3 December, 2012 - 22:18

सर्वांगसुंदर गझल. अतिशय आवडली.

रदीफ अत्यंत उत्कृष्टरीत्या निभावलेली आहे.

अजून येऊद्यात.

Submitted by विजय दिनकर पाटील on 3 December, 2012 - 23:14

सर्वच शेर सर्वांगसुंदर...

मस्त गझल

Submitted by अरविंद चौधरी on 3 December, 2012 - 23:50

नको छेडूस प्रश्नाला "पुरे की आणखी देऊ ?"
मनुष्याने कधी म्हटलेच नाही 'बास' भगवंता

कधी कळणार लोकांना, कसे जिंकायचे तुजला ?
मनी अंधार वसला अन घरी आरास भगवंता

सुंदर... अप्रतिम....

Submitted by अ. अ. जोशी on 7 December, 2012 - 12:57