तारा

तळपता तारा

कोण मी? एक तळपता तारा!
आज मी एक तळपता तारा!

तेजपुंज आहे मम काया,
तमसाची ना तिजवर छाया

लोहगोल मी स्वयंप्रकाशी,
प्रबल, प्रखर, अजय, अविनाशी

सूर्य, चंद्र, ग्रहगोल अन तारे,
झगमगले तारांगण सारे,

कोटी कोटी अणु-विस्फोट,
अनंत वाहती ऊर्जा-स्त्रोत

सार्थ हा खटाटोप सारा,
कोण मी? एक तळपता तारा!
आज मी एक तळपता तारा!

______________________________

निखळता तारा

आज मी एक निखळता तारा !
हाय मी! एक निखळता तारा !

तेजोहीन आज मम काया
तमसाची ही मजवर छाया

बलहीन भुजा अन आज कर माझे
निर्बल, निष्प्रभ अस्त्र मम भासे

शमले सारे अंतरीचे अणु-स्फोट
त्या सवे जाहले खंडित ऊर्जा-स्त्रोत

ना संगत मजला, नाही कुणाची साथ
भरकटलेला, मी तर उल्का-पात !

व्यर्थ का खटाटोप सारा?
आज मी एक निखळता तारा !
हाय मी! एक निखळता तारा !