शेतकरी जोडीचा रांगडा रोमान्स थंडीच्या लाटेला पळवून लावतो

आली थंडीची लाट थेट माझ्या मळ्यात
हुडहुडी शिरली
कशी तनामनात
काया थरथरली मस्ती सुरसुरली
कात चुना रंगे पाना-------------त

थंड वा-याचा झोत घेतो गळ्याचा घोट
बट भुरभुरते
कपाळात
रात गहिवरली ऋत शिरशिरली
शीळ उमटते काना-------------त

थंड शिवार रान, मला करी हैराण
धनी विसरू नका
तुम्ही भान
गारवा रुतला, गळा ठसठसला
कळ धुसफुसली अंगा-----------त
रात गहिवरली ऋत शिरशिरली
शीळ उमटते काना-----------त

सांगतो मी ते कर राज मनात धर
चांदणीचा चारा
पेटवी भारा भर
कोर चंद्राची तोडून वेणीत माळ
थंडी राहील कुठून आकाशा---------त
रात गहिवरली ऋत शिरशिरली
शीळ उमटते काना-----------त

नका बोलू काही, लावू नका च-हाट
ही दमट चांदणी
कशी घेईल पेट
रोगापरीस इलाज आरभाट
राव कुठल्या तुम्ही सपना----------त
रात गहिवरली ऋत शिरशिरली
शीळ उमटते काना-----------त

नाव माझं सर्जेराव,देतो मिशीवर ताव
चल चल ग सखे
अंधारात घाल नाव
अहो सोडा मला धनी धसमुसळा
असा कसा हा हात पिरगळला---------त
रात गहिवरली ऋत शिरशिरली
शीळ उमटते काना-----------त

अंग गरम झालं, जणू तव्यात तिळगुळ
काटा काटा फुले
सा-या अंगांगावर
जसा सुर्य उगवला, भर पहाटेला
नका टोचू मिशी ओठा------------त
रात गहिवरली ऋत शिरशिरली
शीळ उमटते काना-----------त

आता मळ्यामधून, थंडी गेली पळून
लाट ओसरली
जोडी पसरली
भर ओल्या ओल्या शिवारात
रात गहिवरली ऋत शिरशिरली
शीळ उमटते काना-----------त

(जोडीची ही रांगडी प्रीत शेतात लपून पहाणारी सर्व मंडळी आता
ढोलकी वगैरे वाद्ये घेउनच तिथे अवतरतात आणि वाद्यांच्या गजरात
थंडी पारच पळून जाते)

सगळ्यांच्या पोटी
पेटली शेकोटी
उभ्या रानाला तशी
त्याची धग बसली
सर्जेरावाचं कुटुंब मग असं नाचलं की
थुई थुई करते चांदरा-----------त
थंडी विरघळली, अन पळून गेली
कोवळे किरण आले झोका--------त