निरुत्तर

आपल्यातील आपण जेंव्हा पोटचा गोळा म्हणून
जन्म देणार्‍या आईसारखे नसतो,
पालनपोषण करणार्‍या बापासारखे नसतो,
नऊ मास एकाच उदरात वाढलेल्या
सख्ख्या भावंडांसारखेही नसतो,
सगे-सोयरे-प्रियजन ह्यांच्या पैकी
कुणा-कुणाकुणाही सारखे नसतो,
तेंव्हा आपण नक्की कसे असतो?

केवळ प्राक्तन म्हणून अंगभूत गुणा-अवगुणातून
उपजलेली आपण एक व्यक्ती असतो?
समाजानी जशी घडवली त्याचे प्रतिनिधिक असतो?
पंचक्रोशीतील-दशक्रोशीतील व्यवहारातून
उमटलेल्या सवेंदनांचा ठसा असतो?
नक्की आपण कसे असतो..?

- बी