झाडाचं गोल गाणं

झाडाच्या फळातील बी मधून पुन्हा नवीन झाड वाढतं - या जीवनचक्रासारखं गोल-गोल म्हणत राहण्याचं हे गाणं - माझे वडील विश्वनाथ खैरे यांनी नातवंडांसाठी खास लिहिलेलं.

झाडाचं खोड जाडजूड
खोडाला फांदी लांबलचक

फांदीला डहाळी लवलवती
डहाळीला देठ लागले किती

देठाला पान हिरवं गार
पानाला शिरा जाळीदार

देठापाशी लागलं फूल
फुलामध्ये पाकळ्या गोल

फूल गेलं, फळ आलं
फळ पिकलं, गळून पडलं

फळातलं बी मातीत गेलं
पाऊस आला, बी रुजलं

बियाचं झालं रोप कोवळं
रोप वाढलं, वर-वर गेलं

मुळं गेली खोल-खोल
झाड वाढलं गोल-गोल

झाडाचं खोड जाडजूड...