माझा उपास

माझा उपास

मी धार्मिक पुरती बाई साधी भोळी
मी उपास करते सात्विक दोन्ही वेळी
मी धरला परवा उपास दिवसा पुरता
भोवला तरीही काय करू भगवंता?

घेतला सकाळी साय दुधाचा पेला
सोबती चवीला खजूर मी तळलेला
चाखले साखरी लाडू राजगिऱ्याचे
त्यावरी कुरकुरे काप दोन केळींचे

थापली गोलशी थालिपिठेही मोठी
रांधली बटाटा भाजी नाश्त्यासाठी
मग चहा छानसा केला उपवासाला
तोंडात टाकण्या दाणे मुखशुद्धीला

परतली बशीभर साबूदाणा खिचडी
सोबती दुपारी दही काकडी पचडी
लावण्यास तोंडी पापड छोटे तळले
वाटीत जरासे गोड रताळे केळे

पिशवीत घेतली उपवासाची चिक्की
भजनाला गेले धार्मिक मी हो पक्की!
आवाज फुटेना सूर कसा लागेना?
मग आग्रह झाला चहा जरासा घ्या ना !

आटपली भजने दर्शन सुध्दा झाले
वाटेत मला ना सायंतारा दिसले
दाण्याची चटणी खूप वाढली त्यांनी
जी उरली थोडी दोन वड्यांना पुरुनी

घेतले अजुन मग दोन वडे मागून
पानात उरवणे अन्नाचा अपमान
पोचले घरी तर जीव घाबरा झाला
लिंबाचे सरबत उपाय घरचा केला

रात्रीस असटशी भगर शिजवली थोडी
वाटीत बाजूला श्रीखंडाची गोडी
अन् पुऱ्या छानश्या सोबत शिंगाड्याच्या
भाजला शिरा मी तुपात राजगिऱ्याचा

करण्यास मोकळे पाय जरा मी गेले
बाहेर बुध्याच्या मलई बर्फिस भुलले
कोरडा घसाही पडला माझा जेव्हा
घेतले सुगंधी दूध ग्लासभर तेव्हा

पित्ताने माझे डोके रात्री चढले
डोळ्याला नाही डोळा पुरते पिडले
मग कालवला मी दूध दह्याशी भात
उपवास मोडला झोप लागली शांत

डॉ. रोहिणी चंद्रात्रे वाघमारे