शुभविवाह - उर्फ डेडली आत्या

दिवाळीचे सर्व विधी म्हणजे काय? >>> हो खरे आहे. इतके काय असते. ते काय नवरात्र वगैरे नाही.

इथे ढळढळीत प्रकाशात, फॅन बिन बंद करून काडी पेटवायला गेलं तर ती निम्म्यात विझते, वात तेलात सुसाईड करते आणि या साडी नेसलेल्या हिरॉइनी उंबऱ्यावर न ठेचकाळता, रांगोळीवर पाय न देता तीवरची पणती लावतात. >>>

बाकी अजून या लोकांनी सुचण्यासारखा मसाला दिला तर लिहीनच पण एक सीन पाहिला त्यात तिकडे भरत यांनी "खुनाचे आचरट प्रयत्न" हा एकदम चपखल वापरलेला शब्द आठवला

दिवाळीत फटाके उडवताना का कोणास ठाउक हे लोक घराच्या बर्‍यापैकी बाहेर असलेल्या अंगणात अनवाणी असतात. बोट बॉम्बिंग, झोपडी पेटवणे वगैरे वरून आत्या व गँगचे मोडस ऑपरेण्डी आता शालेय लेव्हलच्या कृत्यांवर आले आहे. भूमी कोणतातरी फटाका लावत असताना तिच्या थोड्या मागे नुकतीच संपलेली एक फुलबाजी पौर्णिमा टाकते. तिचा पाय त्यावर पडून भाजावा म्हणून. त्याने नक्की काय होणार आहे माहीत नाही. आत्या त्यावरही खुनशी चेहरे करते.

हो तसेच सीन्स होते. मला वाटलं रन आउट सारखे रिप्ले दाखवत थर्ड अंपायर रिव्यू करतात की काय

आकाश हा टोटल फद्या आहे हे पुन्हा दिसले. मधले बरेच भाग भूमी घरी येणार, नाही येणार, आली तरी थोडी कर्तव्ये पार पाडून मग नेहमीची केसरी ट्रॅव्हल्सची लाल बॅग उचलून महाजनांची थोरली सून माहेरी जाताना घरी चालत जाणार. हे सगळे चालले होते. ते बोअर झाले. त्यात आकाशचा सीईओ रोल हा "हम सिंघासनपर जा बैठे, जब जब करे इरादे" इतकाच असल्याने तो पूर्णवेळ भूमीच्या आठवणीत गर्क असतो. बायकोने घरातील व्यक्तीबद्दल भयंकर आरोप केले आहेत, तेव्हा जरा त्यांच्यावर पाळत ठेवून काही सुगावा लागतो का बघावे वगैरे त्याला काही इंटरेस्ट नाही.

मधे भूमी नोकरी करायला एका ठिकाणी इंटरव्यू द्यायला जाते. तेथे एक बाळबोध कहाणी रचली आहे. तिच्या बाजूचा "कॅण्डिडेट" बाकी सगळे तेथील कॅण्डिडेट्स सोडून फक्त भूमीशी बोलताना त्या कंपनीबद्दल कायकाय बोलतो. भूमी त्या कंपनीला डिफेण्ड करते. तीही गारमेण्ट कंपनीच असते व भूमीला त्यातली (म्हणे) माहिती असते. मग तो "कॅण्डिडेट" तेथून निघून जातो. आणि काय आश्चर्य! नंतर भूमीला मुलाखतीकरता बोलावण्यात येते तेव्हा स्रूप स्रूप कॅमेरा शॉक्स झाल्यावर दिसते की त्या कंपनीचा मालक्/बॉस हा दुसरातिसरा कोणी नसून तोच "कॅण्डिडेट" होता व हिची परीक्षा घेत होता. हा फेवर तेथील इतर लोकांना का नव्हता माहीत नाही.

तिकडे एका जंगी कॉन्फरन्स ची चर्चा सुरू असते. आकाशचे तेथे मोठे स्पीच असते. कंपनीची इमेज त्यावर अवलंबून असते. प्रत्यक्षात त्या कॉन्फरन्स मधे टोटल दोन पुरूष व दोन बायका असतात. आकाशला अभिजितने दारू पाजल्यामुळे तो बोलायच्या स्थितीत नसतो. तेथे आत्या व अभिजित असतात. वास्तविक ते कंपनीत मोठ्या हुद्द्यावर असायला हवेत. कारण आकाश त्या दिवशी ऑफिसमधे गेला नसता तर आत्या सीईओ होणार होती. पण आकाश महाजन अजून का आले नाहीत या प्रश्नावर ते किचन पॉलिटिक्स मधे करतात तसे तेथे उभे राहून कुजबूज करत बसतात.

आकाशची अवस्था भूमीला कळाल्यावर ती डायरेक्ट तेथे येते व कॉन्फरन्स रूम मधे घुसून स्वतःची ओळख सांगते. ती सीईओची बायको असल्याने तेथील आत्यासारखे ज्येष्ठ अधिकारी सोडून तीच उपस्थितांना उद्देशून बडबड सुरू करते. ही कंपनी एका कुटुंबाच्या मालकीची आहे व आकाश "मालक" आहे, की ही इतर कंपन्यांसारखी चालते हे एकदा ठरवा लेको. परवा "बोर्ड ऑफ डायरेक्टर्स" नी सीईओ ठरवला. म्हणजे इतर अधिकारी वर्गही असावा. अशा सिस्टीममधे सीईओची बायको रॅण्डमली येउन कॉन्फरन्समधल्या लोकांना भाषण देते.

आकाशला शुद्धीवर आणण्याकरता थोडा वेळ हवा असल्याने ती कंपनीच्या इतिहासाबद्दल एक फिल्म लावून देते. लहान मुलांना एंगेज करायला कार्टून लावून देतात तसे. ते आलेले लोकही वेळोवेळी अगदी खुष होऊन माना डोलावत असतात, संगीताला दाद दिल्यासारखे (श्रेय - भरत - आकुकाकचा धागा )

आत्या व अभिजितचे एक संभाषण
आत्या: "चार दिवसांपूर्वी आपल्याला एक मेल आला होता तो बघितलास का?"
अभिजितः: "नाही"

पहिले, मेल जरी "मेल" असली इतके शब्दशः घ्यायची गरज नाही. "ती" मेल असते. "तो" मेल नव्हे. . दुसरे म्हणजे "यांना" मेल आली होती? म्हणजे सर्व ऑफिसला घाउक पाठवली होती कोणीतरी? यांचा ऑफिसमधे नक्की रोल काय? अशी कोणती मेल जी कंपनीत कोणत्यातरी पदावर असलेल्या अभिजितला व कोणत्याही पदावर नसलेल्या आत्याला एकदम आली?

त्याहीपुढे - चार दिवसांपूर्वी यांना दिवसभरात एकच मेल आली का? अभिजितला ती विचारते चार दिवसांपूर्वी एक मेल "आला" होता तो पाहिलास का आणि कोणती मेल, कोणाकडून आलेली, कोणत्या विषयावर वगैरे काहीही न विचारता आणि हा म्हणतो नाही.

तिकडे भूमी ज्या गार्मेण्ट कंपनीत अधूनमधून दिसते तेथील बॉस परितोष हा आकाशचा कॉलेजमित्र असतो. भूमी "अधूनमधून दिसते" इतकेच लिहीले. "नोकरी करते" असे नाही, कारण ती तेथे अधूनमधून जाणे व ज्यूस पिणे यापेक्षा काहीच करताना दिसत नाही. आता दोन्ही कंपन्या एका ऑर्डर करता कोलॅबोरेशन करणार आहेत तर यांचा सीईओ थेट त्यांच्या सीईओबरोबर डे-टू-डे काम करणार. त्याकरता आकाश स्वतःच त्यांच्या कंपनीत जाउन बसणार रोज. तेथे तो याला वेगळे केबिन देतो तर आजन्म उपकृत झाल्याचे भाव व संवाद आकाशच्या तोंडी आहेत. त्यात त्याला तेथे असिस्टंट पाहिजे म्हणून पुन्हा भूमी. तीही असिस्टंट म्हणजे त्याच टेबलवर त्याच्याच समोर बसणार दिवसभर.

सीईओचा आब आकाशला सिरीजमधे सुद्धा झेपत नाही. कोणत्यातरी हिंदी पिक्चर मधे भुरट्या चोरांना तोतया सरकारी अधिकार्‍याचे काम करायला सांगतात - वरच्या हुद्द्यावरच्या, पण तेथे पोलिस इन्स्पेटर आल्यावर ते सवयीप्रमाणे उठून उभे राहतात तसे आकाशचे होते. हे लोक टायटल्स मोठ्या अधिकार्‍यांची घेतात पण बॉडी लँग्वेज व संवाद एण्ट्री लेव्हल कर्मचार्‍याचे.

आपल्या लोकांना आकाशची माहिती तो परितोष देतो तो सीन फार विनोदी आहे. मागे स्क्रीनवर एक ग्राफ येतो. त्याकडे बोट दाखवून तो म्हणतो "हा त्यांच्या कंपनीचा ग्राफ". कसला ग्राफ, काय मोजत आहेत, ते वर वर जाणारे बार्स आहेत ते रेव्हेन्यू दाखवत आहेत, की नफा, त्याचे स्केल काय आहे, काही पत्ता नाही. कसलीही चर्चा नाही. एक डावीकडून उजवीकडे मोठे होत गेलेले बार्स असलेला चार्ट, बस्स! त्यात दाखवलेल्या काळामधेच तो ग्राफ तो इतक्या लहान संख्येवरून इतक्या मोठ्या संख्येवर जातो, की त्या ग्राफ मधल्या काळाच्या आधी इतकी वर्षे ही कंपनी नक्की काय करत होती प्रश्न पडेल. अर्थात फक्त आपल्याला. तेथील कर्मचारी माना डोलावतात. ग्राफ इज ग्राफ. त्यात काय विचारायचे.

मग उरलेला वेळ पूर्ण स्क्रीन आकाशचा एक लिन्क्ड इन फोटो दाखवून त्याची तारीफ चालते.

यांना हे ही सांगायला पाहिजे की एखाद्या ठिकाणी तुम्ही २-३ लोकांशी बोलून झाल्यावर निघताना "मी येतो" हे घरगुती/सोशल सेटिंग मधे म्हणतात. कंपनीत तुम्ही लोकांना काम नेमून दिल्यावर तेथून जाताना "मी येतो" म्हणत नाहीत. सीईओ असाल तर काहीच सांगायची गरज नाही. तुम्हाला शंभर कामे आहेत आणि ती तुम्ही करायला चालला आहात हे गृहीत असते.

"पण माझी शिंक काही चुकीची नव्हती" - पौर्णिमा

कधीकधी एखादे वाक्य बास असते एखाद्या एपिसोडबद्दल आख्खा परिच्छेद लिहिण्यापेक्षा