मनोरथाच्या वाटेवरती

Submitted by अनन्त्_यात्री on 4 June, 2024 - 07:57

भू-कवचा विंधून धरेच्या गाभ्याशी जाईन
शून्य गुरुत्वाकर्षण तिथले अधांतरी मोजेन

निंबोणीचे रोप कोवळे चन्द्रावर रुजवीन
अंगाईचे शब्द बदलूनी पुन्हा लिहून काढीन

जर्द तांबडी मंगळमाती शनीवरी शिंपीन
शनि-मंगळ मग युती अनोखी एकवार पाहीन

राहू-केतुची जोडगोळी मग समक्ष बघण्यासाठी
चंद्रसूर्य कक्षांच्या अलगद सोडवीन निरगाठी

सात अश्व सूर्याचे - त्यांना थोपटीन प्रेमाने
त्यांचा दाणा , पाणी , खरारा करीन मी निगुतीने

कृष्णविवर सैराट , भटकते हुडकून मग काढीन
गळाभेट घेईन तयाची -त्यात विरुन जाईन

मनोरथाच्या वाटेवरती वास्तव पसरी काटे
त्या काट्यातून फूल फुलवी जो त्याचे संचित मोठे

विषय: 
काव्यलेखन
Groups audience: 
गुलमोहर - कविता
Group content visibility: 
Use group defaults
शेअर करा

खूप सुंदर!
वेगळ्या विषयावरची छान कविता.

Submitted by छल्ला on 4 June, 2024 - 20:45

Lol मला बोंबिल आवडतात म्हणून मी बोंबलत नाव ठेवणार होतो. मस्त १०० रुपयात वाटा येतो. आम्ही गरीब आहोत म्हणुन सुरमई पापलेट कोलंब्या हलवा आणत नाही. लहानपणीच्या आठवणी ताज्या झाल्या.

Submitted by बोकलत on 5 June, 2024 - 09:00

>>>>कृष्णविवर सैराट , भटकते हुडकून मग काढीन
गळाभेट घेईन तयाची -त्यात विरुन जाईन

कृष्णविवर फार आकर्षक व भीतीदायक वाटतं. नेहमी.

Submitted by सामो on 8 June, 2024 - 12:16