खंतवाणी (मनाचेच श्लोक ! )

एका चुकीपायी | झाले पानिपत
काय माझी गत | तुम्हा सांगू ||

तारुण्यात कोण | केला थयथयाट |
विवाहाचा घाट | घातला गा ||

आंधळा बा ऐसा | बांधले बाशिंग |
आणि रणशिंग | फुंकले म्या ||

मधुचंद्राचे रात्री | चौका-षटकार
गडी वाकबगार | ढेपाळला ||

खेळलो एकाग्रे | सामना प्रत्येक |
परि डाव कैक | अनिर्णीत ||

प्रारब्धी पिलांचे | येई संगोपन |
अता यष्टीरक्षण | चाललेले ||

वाईड , नो बॉल | कधी लेग बाय |
नित्य ठांय ठांय | बायकोची ||

टाकता बयेने | मुखे बाउन्सर |
कापे थरथर | कृश काया ||

कलहाच्या धावा | लागल्यात वाढू |
लाटणे नि झाडू | सीमा पार ||

चोखंदळ बघे | चाळीतील वल्ली |
हाय; गल्लोगली | शिट्या टाळ्या ||

राखीव गड्यांचा | वाटे बहु हेवा |
पुन्हा नको देवा | ऍक्शन रिप्ले ||

विश्व चषकाचा | अता नाही सोस
घेतो राजरोस | निवृत्ति मी ||

***