नभी दाटता खिन्नता अंतरीची

Submitted by द्वैत on 12 February, 2024 - 10:29

नभी दाटता खिन्नता अंतरीची
मला साद देई तुझी प्रार्थना
विझू लागल्या की दिशा दूर दाही
कुठे दीप ठेवू मला सांग ना

कुणाला स्मरावे कुणाला पुजावे
कुणा सांग घालू इथे साकडे
उभ्या घेरुनी या तमाच्या लकेरी
कसे पार जावे प्रकाशाकडे

कशी पांगळ्या या मनाची अवस्था
मला मीच ना सापडे नेमका
जसा शोध घेतो स्वतःचा स्वतः मी
मुका शब्द होतो पुन्हा बोलका

द्वैत

विषय:

Groups audience:

Group content visibility:

Public - accessible to all site users

शेअर करा