वळवळ बाकी

Submitted by किरण कुमार on 19 January, 2024 - 02:28

ओठ हासरे जरी ठेवतो डोळ्यामध्ये खळखळ बाकी
मनात एका खोल तळाशी ती गेल्याची हळहळ बाकी

तहात गेले सारे काही जीव वाचला नसे थोडके
मृत्यू नंतर कुठे राहते रक्तामधली सळसळ बाकी

भव्य यशाचे वाटत पेढे गाव पालथे करून आलो
आणि पाहिली शेजाऱ्याच्या पोटामध्ये मळमळ बाकी

शेतामधल्या मालाला तो भाव मागतो चुकले कोठे ?
झोपडीतल्या पिल्लांसाठी किती राहते कळकळ बाकी

आयुष्याचे चटके बिटके नकोस विसरू सहजा सहजी
खरी वेदना लिहायची तर ठेव अंतरी जळजळ बाकी

रोज दिसे मज अश्वत्थामा गर्दीमध्ये या लोकांच्या
दुःख फाटके डोक्यावरती अन रक्ताची भळभळ बाकी

बह्म कळाले आहे ज्याला तो शांतीने निघून गेला
अध्यात्माच्या शिबिरामध्ये फक्त राहिली वळवळ बाकी

विषय: 
काव्यलेखन
Groups audience: 
गुलमोहर - गझल
Group content visibility: 
Use group defaults
शेअर करा

बह्म कळाले आहे ज्याला तो शांतीने निघून गेला
अध्यात्माच्या शिबिरामध्ये फक्त राहिली वळवळ बाकी >> मस्त!

Submitted by मानव पृथ्वीकर on 19 January, 2024 - 06:31

((बह्म कळाले आहे ज्याला तो शांतीने निघून गेला
अध्यात्माच्या शिबिरामध्ये फक्त राहिली वळवळ बाकी))

वाह क्या बात है!

Submitted by स्वान्तसुखाय on 20 January, 2024 - 09:00

बह्म कळाले आहे ज्याला तो शांतीने निघून गेला
अध्यात्माच्या शिबिरामध्ये फक्त राहिली वळवळ बाकी

>हा शेर भारी आहे

Submitted by भ्रमर on 22 January, 2024 - 01:52

>>>>>ओठ हासरे जरी ठेवतो डोळ्यामध्ये खळखळ बाकी
मनात एका खोल तळाशी ती गेल्याची हळहळ बाकी
हा मला सर्वात आवडला.

Submitted by सामो on 22 January, 2024 - 08:03