भाग 1 आणि 2 इथे वाचा:
भाग १
भाग २
अतिशय भिन्न विचार असलेली दोन किंवा माणसं वर्षानुवर्षे घरात नांदत असली की कोणतंही काम अगदी सुधेपणाने होत नाही.(आता मी यापुढे 'आणि यातच तर खरी आयुष्य जगण्याची लज्जत असते.आयुष्य रुपी जेवणाला चव आणणारं हे माईनमूळ लोणचं.संसाराच्या खमंग पोळीला लावलेलं चमचमीत वऱ्हाडी तिखट.असंच हाय हुय करत हे तिखट खात नंतर जिभेवर आलेली गोड आफ्टरटेस्ट न्यारीच.असंच हे तिखट लोणचं,प्रेमाचे गुलाबजाम,समजूतदारपणा चा वरणभात,गॉसिपिंग ची चटणी खात जे जेवण खाऊन एक दिवस यथावकाश मृत्यूरुपी तृप्त ढेकर द्यावा.' असं लिहून तुमच्या साठी वात्रट व्हॉट्सअप फॉरवर्ड अजिबात तयार करणार नाहीये. घाबरू नका.) इंटिरिअर वाल्याना विरोध करण्या वरून झालेले हे काही संवाद वानगीदाखल:
'अरे तू त्यांच्या सगळ्या सूचनांना हो म्हणून मान काय हलवतोस?त्यांचं काय जातंय सगळीकडे काचा लावायला?उद्या काचेच्या भिंती वाला संडास सुचवतील.'
'मग तू कर ना विरोध.तुला मी कधी अडवतो का?'
'मी करते आहेच.पण तू जर नेहमी साने गुरुजी बनून राहिलास तर मला नेहमी विरोध भूमिकेत जावं लागेल आणि ते पाठीमागे 'साहेब बिचारा भला माणूस पण त्याची बायको हडळ आहे' म्हणतील.'
'जसं काय आपण विरोध करत नाही तोपर्यंत आपल्या मागे ते आरत्याच ओवाळतात की नाही.विरोध तुझा आहे.व्यक्त तूच करायचा.'
'म्हणजे मी केला नाही तर तुला घरातल्या सगळ्या कपाटाना काचेची शटर आणि त्यातून दिसणारा पसारा चालेल का?'
'किती निराशावादी सिनिक आहेस गं तू!! पसारा होणाऱच असं सुरुवातीपासून धरून चाललं तर कठीण आहे.माझ्या कपाटात तरी अजिबात असं होणार नाही.'
'हे बघ,आतापासूनच शब्द देऊ नकोस.तुझे शब्द काय आहेत मला माहिती आहे.तू 3 वेळा सिडलिंग ट्रे आणून त्यात मायक्रोग्रीन वाढवून सॅलड खाणार होतास.3 वेळा ते गॅलरीत पडून सडलेले,तुटलेले ट्रे मी फेकलेत.'
'हे बघ,प्रत्येक भांडणात सिडलिंग ट्रे आणायची गरज नाही.दम है तो इंटिरिअर वाल्याना विरोध कर वरना ग्लास शटर बरदास्त कर.'
'सिडलिंग ट्रे' हे आमच्या सर्व भांडणांमधलं ब्रह्मास्त्र आहे.जसा ड्रॅकुला ला परतवायला क्रॉस तसा भांडणातल्या नवऱ्याला गारद करायला सिडलिंग ट्रे.
'ओ' ला अतिशय आवडणाऱ्या 2 गोष्टी: प्रोफाईल शटर्स उर्फ काचेची कपाट दारं आणि 'हायड्रॉलीक शटर्स' उर्फ वर उघडणारी दारं.दोन्हीला मी कडाडून विरोध केला.एकतर 15 वर्षांपूर्वी केलेल्या इंटिरिअर मध्ये आम्ही लांब राहत असल्याने पाहणी करायला सारखं येणं न जमल्याने आणि मुख्य सुतार 6 फूट 2 इंच असल्याने त्याने आपल्या उंचीनुसार लावलेली स्वयंपाकघरातली कपाटं.कोणतंही कपाट आतली वस्तू बरगडीत उसण भरल्याशिवाय किंवा कुठून तरी धडपडत शिडी घेऊन आल्याशिवाय दाद न देणारं.हायड्रॉलीक शटर्स वर उघडणारी सर्वात छतालगतच्या शेल्फ ला लावणं हा दिसायला एकदम सुंदर गुळगुळीत एकसंध, हँडल न दिसणारा प्रकार असला तरी बुटबैंगण माणसाला ऍक्सेस ला अतिशय मूर्खपणाचा आणि वेदनादायी होता.त्यामुळे शेवटी शेवटी माझा 'जब वी मेट' मधला अंशुमन, 'क्यो देखू मैं गनने के खेत, नही देखणे मुझे गनने के खेत!!!' झाला.आता यातल्या बऱ्याच शेल्फ ना हाताला येईल असा एक दांडा असतो, तो धरून झाकणं खाली ओढता येतात.
'कटकटी चिडकी बाई शक्यतो सगळ्याला नाही म्हणणार' हे 'ओ' ला माहीत असल्याने ओ चे साईट सुपरवायझर आधी सरांना फोन करून पटवून घेऊ लागले.मग आम्ही सर्व निर्णयात व्हिडिओ कॉल करून चर्चा करून एकमेकांना आणि 'ओ' ला सेम पेजवर आणलं.सुदैवाने हे प्रकार 10-20 मिनिटात आवरत असल्याने ऑफिस कामाला याचा फटका बसला नाही.
'ओ' ची काम करण्याची प्रोसेस शिस्तबद्ध होती.ठराविक टप्प्यात 2डी डिझाईन शेअर करणे, ठराविक रक्कम मिळाल्यावर बिल ऑफ मटेरियल शेअर करणे, ठराविक रक्कम मिळाल्यावर 3डी चे फोटो शेअर करणे(प्रत्यक्ष डिझाईन पाठवले जात नाही.),ठराविक रक्कम दिल्यावर मापं आणि फॅक्टरी फर्निचर ची कट लिस्ट बनवायला येणे, ठराविक रक्कम दिल्यावर सर्व मटेरियल साईट वर टाकणे असे.यात सर्वात जास्त नियमित गोष्ट अकौंन्ट कडून हफ्ता मागणी होती.मग असा कामाचा काही काळ सुरळीत गेल्यावर 'ओ' चा आणि आमचा नाच गं घुमा चा खेळ चालू झाला.
आम्ही: 'नाच गं घुमा!!'
'ओ': 'या गावचा, त्या गावचा, इलेक्टरीशीयन गावी गेला, पैसे नाही मला, सामान नाही मला, कामगार नाही मला,कशी मी नाचू!!'
आम्ही: 'नाच गं घुमा!पैसे घे तुला,कामगार दे मला, सामान घे मला, नाच गं घुमा!!'
'ओ' ची गंमत ही की हफ्ता मागणी करून हफ्ता घेण्याच्या 2 दिवस आधी ते साईटवर पूर्ण 4 सुतार,1 इलेक्टरीशीयन ची टीम लावत.मग खुश होऊन आम्ही हफ्ता दिला की दुसऱ्या दिवशी पासून फक्त एक पाप्याचं पितर प्लास्टर वाला, इन्व्हेंटरी नाही, साईट सुपरवायझर दुसऱ्या साईट वर असे प्रकार चालू होत.'ओ' ने आमचं काम घेतलं तेव्हा त्यांच्याकडे बिझनेस कमी होता.आमचं काम घेतल्यावर सृष्टीत पॉझिटिव्ह गुडलक लहरी निर्माण होऊन त्यांच्याकडे 5 मोठी प्रोजेक्ट आली आणि त्यांच्यावर छाप पाडणे महत्वाचे ठरू लागले.
त्यात 'ओ' च्या एकंदर रिसॉर्स मॅनेजमेंट मुळे एक इलेक्टरीशीयन येऊन आधीची पाहणी करणार, दुसरा येऊन भिंतींना खड्डे पाडून वायरीची खाच बनवणार,तिसराच येऊन स्विचबोर्ड लावणार असा सगळा खो खो होता.या खो खो मध्ये मूळ कॉन्स्टंट आम्हीच असल्याने आम्हाला डोकं ठिकाणावर आणि थंड ठेवून सर्वाना एका पानावर ठेवणं गरजेचं होतं.सुतार टीम बदलत राहिल्याने त्यांनी टीव्ही चं पॅनल 3 वेळा काढून परत बसवलं. आमच्या दोघांपैकी जे कोणी ऑफीस ला जाईल त्याचा व्हॉटसअप वर पहिला प्रश्न 'आज टीव्ही पॅनल परत तोडलं का लॅमीनेट बसवलं' हा असायचा.प्रत्येक ऑफिस ला जाणाऱ्या निरागस जीवाला 'आपण घरी येऊ तेव्हा काहीतरी एक आयटम जोडला गेला असेल,छान वस्तू लावता येतील' असं वाटायचं.घरी येऊन बघावं तर एखाद्या बिझी सलून मध्ये 5 माणसांच्या अर्ध्या अर्ध्या दाढ्या करून फोन घ्यायला बाहेर जाणाऱ्या माणसा सारखं एक कपाटाचे फक्त 2 कप्पे, दुसऱ्याचं दार,तिसऱ्याचं मॅग्नेट राहिलेलं असं सगळंच फर्निचर अर्धंमुर्ध दिनवाणं उभं असायचं.(सुतार काही चूक करत नव्हते. जितकी फायनल प्रोडक्ट लॅमिनेट लावलेली जास्त, तितकें ओरखडे, गोंद न सांडणे,वेल्डिंग कटिंग च्या ठीणग्या जाऊ न देणे याबद्दल जास्त जपावं लागतं.)आता आता जरा सगळ्या पृष्ठभागावर लॅमिनेट लागायला लागले.
ओ च्या चांगल्या गोष्टी या की मटेरियल आणि कामाची प्रत चांगली आहे.शिवाय त्यांनी आमच्या डोक्यातल्या अनेक अबस्ट्रॅक्ट कल्पना नीट पूर्ण केल्या.यातली महत्वाची माझ्यासाठी म्हणजे परदेशात असते तशी शूज, कोट्स आणि हेल्मेट काढून ठेवण्याची लिव्हिंग रूम च्या एका कोपऱ्यात करण्याची चिमुकली(आत नुसती उघडी शेल्फ असलेली) लाकडी खोली.(याला आम्ही 'पसारा करण्याची खोली' म्हणतो.आम्ही आता लिव्हिंग रूम च्या सर्व पृष्ठभागावर टाकतो त्या गोष्टी एकाच खोलीत टाकायच्या.)दुसरी गोष्ट म्हणजे पार्सल्स आत टाकता येतील अशी चौकोनी झडप खिडकी असलेलं दार.हे रेडिमेड दारांमध्ये पण मिळतं.
अश्या प्रकारे गणपती नंतर नवरात्रात 'पूर्ण होणार' अशी वदंता असलेलं काम दिवाळीत पूर्ण होणार होतं.पण 'तुमच्याकडे साईटवर बनवायच्या गोष्टी खूप जास्त आहेत' म्हणून ते अजून बाकी आहे.बहुतेक दिवाळी नंतर 15 दिवसात होईल.आम्हीही मख्खपणे सामानाच्या ढिगात स्वयंपाकघर आणि एक खोली मोकळी स्वच्छ आणि टापटीप ठेवून तिथे मजेत राहतो आहोत.जेव्हा होईल तेव्हा होईल.
सध्या सोसायटी वाले सोसायटीत चकरा मारता मारता भेटले की 'क्या बात है,अभीभी पुरा नही हुवा, महल बना रहे हो क्या' विचारतात.आम्ही पण शांतपणे 'ह्या ह्या ह्या, होने के बाद आ जाओ देखणे' म्हणून महाल बनवत असल्याच्या ऐटीत म्हणून पुढे निघून जातो!! कितीही छोटे बदल असले तरी आमच्यासारख्या कष्टाच्या व्हाईट मनी ने आयुष्यात कधीतरी मोठं काम काढणाऱ्या लोकांसाठी आमचा महालच तो.
तीनही भाग भन्नाट!
तीनही भाग भन्नाट!
हाही भाग आवडला.
हाही भाग आवडला.
तिन्ही भाग एका मागोमाग वाचले
तिन्ही भाग एका मागोमाग वाचले . नेहमीप्रमाणे खुसखुशीत .
तिन्ही भाग वाचले. मस्त
तिन्ही भाग वाचले. मस्त लिहिलंय.
बऱ्यापैकी रिलेट झाले.
प्रत्येकाच्या आयुष्यात हे
प्रत्येकाच्या आयुष्यात हे अनुभव आले असतील किंवा येतील पण त्याकडे इतक्या विनोदी नजरेने पाहणे तुम्हालाच शक्य झालंय ! = अनुमोदन आणि खास म्हणावंसं वाटतं की अनु="मोदन " हे अविभाज्य समीकरण झालंय आता. खरोखरच अनु, तुम्हाला अफाट निरीक्षणाधारित खुसखुशीत लेखन शैली गवसली आहे.. (मंगला गोडबोलेंची आठवण झाली) इतकं औपरोधिकतेतून विनोद तोही लागट नव्हे, तुमच्या लिखाणात इतका सुरेख आढळून येतो की व्वा..
Submitted by प्राचीन on 16
Submitted by प्राचीन on 16 November, 2023 - 07:24 >> +११
प्राचीन, तुम्हाला अनुमोदन!
प्राचीन, तुम्हाला अनुमोदन!
खूप हसले वाचून! आमच्याकडे परीक्षेच्या वेळी नेमके कोणीतरी शेजारी किव्वा घरचेच (face-palm) असे काम काढायचे, असला राग यायचा...
तो लादी किव्वा संगमरवर कापण्याचा आवाज तर अगदी नको नको करायचा... असे अनुभव घेऊन त्यावर इतके छान नर्मविनोदी लिखाण करणे तुलाच जमते.
फोटो attach कर. मला ती खोली पहायची आहे.
सर्व नव्या प्रतिसादक मित्र
सर्व नव्या प्रतिसादक मित्र मैत्रिणीनो,धन्यवाद.
मंगला गोडबोले वाचत वाचत मी मोठी झाले.कधीकधी मुद्दाम, कधीकधी नकळत त्यांची शैली कॉपी केली जाते.
खुपच खुसखुशित लिखाण आहे
खुपच खुसखुशित लिखाण आहे

प्राचिन ह्यांच्या प्रतिक्रियेशी सहमत.
क्रिप १, क्रिप २, सिडलिंग ट्रे' आणि अनेक ... वाचून खुदूखुदू हसायला आलं!
मस्त लिहलय!! एकदम खुसखुशीत
मस्त लिहलय!! एकदम खुसखुशीत
सध्या आमच्याकडे पण इंटिरियरचे काम चालू असल्याने बऱ्याच गोष्टी रिलेट झाल्या!!
त्यातून अस्मादिकांना क्रिएटिव्ह सेन्स असल्याचा ठाम समज असल्याने डिझायनरच्या डिझाईनवर आपल्या कल्पनाशक्तीच्या चार रेघोट्या ओढल्याशिवाय कुठलेच डिझाईन फायनल केले नाहिये


टिंबर मार्केटच्या चार पाच चकरा तरी झाल्यात; छोट्या मोठ्या गोष्टींसाठी दशभुजा गणपतीजवळच्या शांती मध्ये जाऊन जाऊन तिथल्या कोणत्या ड्रॉवरमध्ये काय आहे हे पण आता पाठ झालेय
टी पट्टी, लूवर्स, चारकोल, प्रोफाईल पट्टी, ग्रूव्हींग, चॅंफर, बॉक्सी वगैरे अनेक गोष्टी/शब्द नव्याने माहित होतायत
झरी मारणे, पुढे चाल देणे, रंधा मारणे वगैरे स्लॅंग्स तोंडावर रुळल्यात.
बराच अनुभव जमा झालाय
प्रोफेशनल फोटोग्राफी करणे, हॉटेल काढणे, कोकणात जागा घेऊन विकेंड होम चालवणे वगैरे अनेक जोडधंद्यांच्या स्वप्नगर्दीत हा अजुन एक जोडधंदा करता येईल का याचे स्वप्नरंजन चालू आहे.... फक्त चांगले कामगार मिळायला पाहिजेत
आमचा एक कारागीर तर चहा पित नाही त्यामुळे त्याच्यासाठी म्हणून सध्या रोज फिल्टर कॉफी बनते.... पण कष्टाळू आहेत माणसे..... सकाळी ९च्या ठोक्याला येतात आणि रात्री ९ पर्यंत अखंड काम करतात.... एखाद्या दिवशी आम्हाला बाहेर जायचेय म्हणून त्यांना आवरते घ्यायला सांगितले तर जिवावर आल्यासारखे आवरुन बाहेर पडतात (कारागीर मराठी नाहीत हे वेगळे सांगायला नको!!)
असो!! एकदा का हे फर्निचर झाले की मग रंग, मग पडदे अश्या अनेक गोष्टी आहेतच
मलाही कारागीर हवे होते. फक्त
मलाही कारागीर हवे होते. फक्त बेडरूम्स राहिले होते गेल्या वेळी.
म्हणजे ठेवून दिले होते. आधीचे कारागीर फोन उचलत नाहीत, उचलला तर येतो म्हणतात पण येत नाहीत.
त्या वेळी कोविड मुळे घेतलं होतं काम. आता ते अंबानी अदानी झाले आहेत.
तिन्ही भाग आवडले. एकदम
तिन्ही भाग आवडले. एकदम खुसखुशीत.
तिन्ही भाग एकदम मस्त !
तिन्ही भाग एकदम मस्त !
धन्यवाद मंडळी.छान अनुभव शेअर
धन्यवाद मंडळी.छान अनुभव शेअर करत आहात सगळे. प्रत्येकाची वेगळी लेखमाला बनेल.
शूज हेल्मेट जॅकेट रद्दी
शूज हेल्मेट जॅकेट रद्दी ठेवण्याच्या छोट्या खोलीबद्दल बऱ्याच जणांनी कुतूहल व्यक्त केले, त्यामुळे इथे फोटो टाकते आहे.


4 हेलमेट, 3 लॅपटॉप बॅग, 4-5 जॅकेट,पावसाळ्यात वापरायचे अवांतर रेनकोट छत्री असे ठेवता येईल.यात उभं राहायला/दार बंद करून एक छोटं स्टूल घेऊन बसायला जेमतेम जागा आहे.आतून कोणी लहान मुलाने दार लावून घेऊ नये म्हणून कडी नाहीये.वर व्हेंटिलेशन साठी छिद्रे आहेत.याला दार म्हणून लावलेले आहे ते एका जुन्या फर्निचर चा भाग आहे(बाकी रंगरंगोटी अजून व्हायची आहे.कधी योग येणार काय माहित.)
मस्त आहे डोकॅलिटी. पॅसेज मधे
मस्त आहे डोकॅलिटी. पॅसेज मधे पण येईल कि करता
हो, पॅसेज मध्ये पण करता येईल.
हो, पॅसेज मध्ये पण करता येईल.
या दाराला बाहेरून कडी नको,
या दाराला बाहेरून कडी नको, असे माझे मत आहे. कुणी आत अडकून बसू शकेल. फार तर आतून बाहेरून उघडता येणारा door knob बसवावा.
अजून एक आयडिया, ही खोली थोडी
अजून एक आयडिया, ही खोली थोडी मोठी करण्यासाठी अजून थोडे मोठे ऐसपैस घर घ्यायचे. मग तिकडचे इंटीरिअर नव्याने करायचे.
मूळ प्लॅन याला फक्त उघडायला
मूळ प्लॅन याला फक्त उघडायला हँडल्स आतून बाहेरून हा होता.सुतारांनी कडी लावली.तसं आम्हाला चालणार आहे, पुढे अजून बदल उचकापाचक नको म्हणून.बाहेरून लॉक होऊ नये म्हणून योग्य चाईल्डप्रुफिंग करण्यात येईल नंतर(अर्थात सध्या नात्यात कोणी चाईल्ड नाहीत.)
छान दिसतंय हे!
छान दिसतंय हे!
उबो +१. घरात वॉशरुम्स सोडल्या तर कडी कुठेच नको. डोअर नॉबला दाराचा थिकनेस स्टँडर्ड मध्ये लागत असेल आणि हे दार उरलेल्या लाकडातून केल्याने स्टँडर्ड साईझचा डोअर नॉब बसत नसेल तर मॅग्नेट लावून दार फ्लश बंदही होईल. कडी आयसोअर होते आहे. हे अगदी एंट्रंसला हाय ट्रॅफिक एरियात आहे त्यामुळे छान महागातलं हँडल लावा या दाराला.
आणि कडी ठेवायची असेल तर कडी बदला बरं! ती बदलणारच असाल ही टेंपरवारी असेल अशी खात्री आहे पण आता आता फोटू टाकलाच आहे तर रिव्यू कमेंट दिल्या शिवाय तर रहावत नाही, त्यामुळे भोआकफ!
तो शूज काढा/ घालायला केलेला बेंच आवडलेला आहे. त्याच्या खालच्या ड्रॉवर फक्त कोणी येणार असेल की पसारा सरकावायला ठेवा. त्यात डेसिग्नेटेड काही ठेवू नका.
ही कडी कोयंडा पाहून मिस्टर
ही कडी कोयंडा पाहून मिस्टर बिन त्याच्या हिरव्या मिनी गाडीला कुलूप लावतो ते आठवलं की नाही
बघू काहीतरी चांगलं हँडल लावू कडी काढून.
हिरव्या मिनी गाडीला कुलूप
हिरव्या मिनी गाडीला कुलूप लावतो ते आठवलं की नाही >> बिंगो!
दार आतून उघडता येणे सर्वात
दार आतून उघडता येणे सर्वात महत्त्वाचे आहे. संडास/टॉयलेट आणि बेडरूम वगळता सर्व दारांसाठी हे अत्यावश्यक आहे, असे माझे मत.
अनु, अमित
उबो +१
ही अशी बाहेरून असलेली कडी 'पोर्टापॉटी'ची आठवण आणते.
ह्याला उत्तर अमेरिकेत कुठंकुठं 'मड रूम' म्हणतात, जिथे मोठमोठे स्नोबूट्स बसून काढायला बेंच व बूट ठेवायला शेल्फ आणि जॅकेट अडकवायला खुंट्या असतात. माझ्या एका मैत्रिणीने 'मड रूम'ला देवघर केलं होतं, पहिल्यांदा येणारे सगळे बुटंचपला- जॅकेट घेऊन देवघरात जायचे, ती त्यांच्या मागे 'मंदिर है वहां' म्हणत मागे जायची, मग गेलेले लोक कसाबसा नमस्कार करून अवाक होऊन बाहेर यायचे. हा कार्यक्रम वर्षभर चालला. असं का तर बसून दार बंद करून घंटाभर ऐसपैस पूजा करायला वेगळी छोटी खोली हवी होती. सोवळंओवळं व कांद्यालसणाचा वास बंद दाराआड देवापर्यंत जाऊ नये म्हणून.
हो हो. मड रुम ही आमची बेसिक
हो हो. मड रुम ही आमची बेसिक रिक्वायमेंट होती.
मेन दारातुन फक्त पाहुणे येणार. घरातल्या लोकांनी गराज मधुन - मडरुम मधुनच यायचं ह्या नियमाचं पालन करायला मी दांडुका घेऊन मागे लागतो. आत विंटर आला आहे तर अगदी काटेकोर!
@अस्मिता, नशीब आपल्या देवांत कोणी क्लस्ट्रफोबिक नाही!
हो बरोबर. मडरूम. सुरुवातीला
हो बरोबर. मडरूम. सुरुवातीला ही कल्पना 'ओ' इंटिरिअर ला दाखवल्यावर त्यांनी मोठ्यामोठ्या सेलेब्रिटी सारख्या काचेच्या शोकेस वाल्या वॉक इन क्लोजेट दाखवून दाखवून वात आणला.तेव्हा बऱ्याच मडरूम्स गुगल करून शोधून दाखवल्या.
तिन्ही भाग भारी जमले आहेत.मड
तिन्ही भाग भारी जमले आहेत.मड रूम वरून TLC इत्यादी चॅनेल वरचे इंटिरियर home improvement शी संबंधित अनेक छान कार्यक्रम आठवले.
मस्त आहे डोकॅलिटी....... +१.
मस्त आहे डोकॅलिटी....... +१.
ती मडरूमची आयडिया भयंकर आवडली
ती मडरूमची आयडिया भयंकर आवडली आहे.
Pages