उपक्रम -१ - मी परी झाले तर - सामो

'Whenever a child says I don't believe in fairies there's a little fairy somewhere that falls right down dead' .............. असं म्हणतात - जेव्हा एखादं बाळ परीवरती अविश्वास व्यक्त करतं तेव्हा-तेव्हा म्हणे कुठेतरी एक परी मरुन पडते.
.
वरील वाक्य जर खरं असेल तर मग एखादं बाळ खळी पाडत किंवा कसेही - गोड गोड हासले की त्या हास्याचे चांदणं लेवुन एखादी परी जन्मालाही येत असेलच की.
मला व्हायचय तशी परी.
त्या बाळाकरता गार्डिअन एंजल असलेली परी.
फक्त त्या बाळालाच भोकर्‍या डोळ्यांनी दिसणारी परी.
बागेत आई घेउन आली ना की बाळ दुडूदुडू बागडताना, त्याला जपेन मी, पडू नाही देणार की रडू नाही देणार.
आम्ही दोघ खेळताना, मी लपून बसले की बाळ मला शोधत शोधत आईला विचारेल "परीराणी कुठे गेली आई. बोलाव ना तिला." पुस्तक वाचनात दंग असलेली आई म्हणले, "छकुले, अगं परी काही खरी नसते. कुठुन आणू मी तुला परी?" मग बाळ आणि मी दोघं पोट धरुन हसू. आईला काही कळत नाही. आपलं सिक्रेट बरं का.
झोपेतही त्याच्या स्वप्नात जाउन त्याला हसवेन. त्याला गोष्टी सांगेन.
गार्डिअन एंजल आहे ना मी, बाळाला प्रत्येक धोक्यापासून मैलोन मैल दूर ठेवीन.
परी असल्याने माझी युनिकॉर्नशी गट्टी असणारच ना. मी बाळालाही परीराज्याची सैर करुन आणिन. त्याची ओळख युनिकॉर्नशी घालून देइन.
.
.
अजुन महत्वाचे काम म्हणजे माझी गट्टी इतर गार्डिअन एंजल्स बरोबरही असणार. मग त्यातले काही कामचुकार असणार, झोपाळू, आळशी, बथ्थड असणार.
त्या सगळ्या एंजल्स्ची चांगली खरडपट्टी घ्यायचीये मला.
आमच्या निष्पाप बाळांवरती लक्ष ठेवायचे सोडून झोपा काढणार्‍या सगळ्या देवदूतांची बदली करुन मला कामसू, चाणाक्ष, हुषार देवदूत आणायचेत. कारण आजकाल ही जमात फार पाट्या टाकू लागलेली आहे.
.
होता येइल का अशी परी? इवल्याश्या पिल्लाची लाड्की आणि शक्तीवान परी!! आयुष्यभर त्याचे रक्षण करणारी, भले चिंतणारी, त्याला प्रत्येक धोक्यापासून मैलोन मैल दूर ठेवणारी.